24 лістапада, Капыль /Уласн. iнф./У перыяд восеньскіх канікулаў праходзіў другі этап рэспубліканскіх прадметных алімпіяд. У іх прынялі ўдзел 394 навучэнцы ўстаноў адукацыі Капыльшчыны, якія паказвалі свае веды па 15 прадметах.
Мэта кожнай алімпіяды — выявіць інтэлектуальна адораных хлопчыкаў і дзяўчынак, каб і надалей працаваць з імі на больш высокі рэзультат. Заданні былі даволі складаныя, разлічаныя на высокую эрудыцыю, начытанасць, веданне правілаў, формул і вывадаў. Па ўмовах алімпіяды пераможцам мог быць вучань, які набраў найбольшую колькасць балаў, дыпломамі І і ІІ ступеней будуць узнагароджаны 182 удзельнікі.
Па жаданні можна было прымаць удзел у спаборніцтве па некалькіх прадметах. І некаторыя хлопчыкі і дзяўчынкі гэту магчымасць удала скарысталі. Напрыклад, не адна перамога на рахунку гімназістаў Лізы Чаркас і Станіслава Цвірко, навучэнцаў СШ № 2 г. Капыля імя Ц. Гартнага Вячаслава Калевіча, Яніны Іўлевай, Рамана Шчэрбы, Веранікі Станкевіч, а таксама Мацвея Капусты і Анжалікі Макарчук з СШ № 3 і Івана Русакевіча з Быстрыцкай СШ.
Усяго па выніках раённай прадметнай алімпіяды 42 работы накіраваны на разгляд абласной камісіі. Пасля яе пасяджэння і будзе вядома, хто ж прыме ўдзел у наступным этапе.
