20 лютага, Капыль /Уласн. iнф./Капыльскім раённым выканаўчым камітэтам высока ацэнена праца некаторых кіраўнікоў і спецыялістаў раёна, якія ўнеслі значны ўклад у развіццё прамысловага патэнцыялу горада, прыцягненне інвестыцый у асноўны капітал, укараненне інвестыцыйнага праекта, развіццё сельскагаспадарчай вытворчасці, выкананне дзяржзаказу і інш. Так, Ганаровымі граматамі ўзнагароджаны Анатоль КРУГЛЯКОЎ, кіраўнік фермерскай гаспадаркі “Эліта-К”, Віктар БАРЫСАЎ, галоўны інжынер СТАА “Капыльская вытворчасць будаўнічых сістэм”, Уладзімір ВАРАБ’ЁЎ, дырэктар СТАА “БетонБокс”, Алег ТУМІЛОВІЧ, дырэктар ТАА “Саліта”.
Больш за 45 гадоў свайго жыцця аддаў сельскай гаспадарцы Анатоль Васільевіч Круглякоў. Ёсць у яго паслужным спісе праца аграномам-агароднінаводам, галоўным інжынерам і дырэктарам трэста агароднінных саўгасаў, начальнікам глаўка ў міністэрстве, дырэктарам Інстытута агароднінаводства і бульбаводства, дацэнтам кафедры ў інстытуце павышэння кваліфікацыі работнікаў сельскай гаспадаркі. Але цяга да зямлі, да творчай і стваральнай працы на ёй нарадзіла рашэнне і пасля выхаду на заслужаны адпачынак не развітвацца з любімай справай. Так 15 мая 1997 года ў в. Агароднікі Капыльскага раёна з’явілася фермерская гаспадарка, дзе Анатоль Васільевіч ажыццявіў свой намер вырошчваць насенную бульбу і агародніну — тое, чаму ён прысвяціў усё жыццё. Пачыналі з плошчы ў 50 га, сёння гаспадарка ўжо мае ў сваім распараджэнні 230 га.