21лютага, Капыль /Уласн. iнф./Органы мясцовага кіравання і самакіравання Цімкавіцкага сельскага Савета дэпутатаў добра разумеюць тыя задачы, якія стаяць перад імі па вырашэнні пытанняў жыццядзейнасці насельніцтва і развіцці тэрыторыі сельсавета. На яго тэрыторыі размешчана больш за трыццаць прадпрыемстваў, арганізацый і ўстаноў, якія паспяхова выконваюць свае прамысловыя паказчыкі і прымаюць актыўны ўдзел у грамадскім жыцці. На працягу 2011 года праводзілася работа па добраўпарадкаванні тэрыторый і навядзенні парадку на зямлі. Надавалася вялікая ўвага прывядзенню грамадзянскіх могілак у парадак, спілоўванню аварыйных дрэў, зносу непрыгодных агароджаў. Праводзілася работа па пераразмеркаванні пустуючых участкаў у аг. Цімкавічы, вёсках Рачкевічы, Варонаўшчына, Доўгае. Актыўны ўдзел у праводзімых работах прымалі мясцовыя жыхары, дэпутаты сельскага Савета дэпутатаў, а таксама старэйшыны населеных пунктаў.