28 красавіка, Капыль /Уласн. iнф./У ліку трох раённых газет Міншчыны запрашэнне ўзяць удзел у XVI Міжнароднай спецыялізаванай выставе “СМІ ў Беларусі”, якая сёлета праходзіла сумесна з XIX Міжнародным форумам па тэлекамунікацыях, інфармацыйных і банкаўскіх тэхналогіях “Tibo-2012” у сталічным Футбольным манежы, атрымала і рэдакцыя газеты “Слава працы”. Была падрыхтавана прэзентацыя выдання, і ў чацвер удзельнікі выставы і шматлікія наведвальнікі змаглі больш даведацца пра мінулае і сённяшні дзень Капыльшчыны, работу калектыву рэдакцыі па стварэнні якаснага, інфармацыйна насычанага выдання. Заслужаныя апладысменты атрымаў і вядомы капыльскі музыка Аляксандр Булакевіч. Чароўныя гукі яго дудкі сталі цудоўным дапаўненнем да прапанаванага відэаматэрыялу і надалі прэзэнтацыі непаўторны нацыянальны каларыт.