11 ліпеня Капыль /Уласн. iнф./У г. Мар’іна Горка ў мінулую пятніцу прайшла ўрачыстая цырымонія перадачы аўтамабіляў, набытых за сродкі Мінаблвыканкама, воінам-інтэрнацыяналістам, якія сталі інвалідамі пасля баявых дзеянняў на тэрыторыі іншых дзяржаў.Чатыром ветэранам афганскай вайны – прадстаўнікам Міншчыны – ключы ад новых аўтамабіляў “Лада” ўручыў старшыня Мінаблвыканкама Барыс Батура. Каштоўны падарунак ад аблвыканкама атрымаў і Іван Пыско з аг. Семежава Капыльскага раёна . Іван Міхайлавіч Пыско пасля заканчэння Салігорскага вучылішча будаўнікоў і курсаў вадзіцеляў у Нясвіжскім ДТСААФ у 1981 годзе трапіў служыць у Афганістан. А ў 1982 годзе пры выкананні баявога задання пры абстрэле пад г. Джэлалабадам атрымаў калецтва і шматлікія раненні. За баявыя заслугі воін-афганец атрымаў ордэн Чырвонай Зоркі і шэраг іншых узнагарод. Ветэран афганскай вайны выказаў вялікую ўдзячнасць кіраўніцтву вобласці і раёна за тое, што воінаў-інтэрнацыяналістаў памятаюць і аказваюць ім сацыяльную дапамогу. А ўручэнне такога падарунка стала адным з самых хвалюючых момантаў у яго жыцці. У той жа дзень воіны-інтэрнацыяналісты сталі ўдзельнікамі ўроку мужнасці для навучэнцаў ваенна-патрыятычных класаў і паглядзелі паказальныя выступленні воінаў пятай асобнай брыгады спецыяльнага прызначэння.