20 ліпеня, Капыль /Уласн. iнф./ Сёлета ў раёне запланавана ўвядзенне ў строй трох новых збожжасушыльных комплексаў. Адзін з іх днямі пачынае сваю работу ў МАУП “Доктаравічы”. Ужо адбылася камісійная прыёмка аб’екта. Пад збожжавыя культуры у гаспадарцы адведзена 1700 га, пад рапс – 150 га. Цяперашняя сушыльная гаспадарка (КЗС-10 і КЗС-20) ужо састарэла. Пры малой прадукцыйнасці і зношанасці абсталявання яе вытворчасць складала не больш за 30-40 т збожжа за змену. З увядзеннем новага комплексу плануецца перапрацоўваць да 400 т, а пры ідэальных умовах — і 500 т збажыны.У сельгаспрадпрыемстве валавая вытворчасць збожжавых і зернебабовых за апошнія гады складае не менш за 6 тыс. тон, сёлета чакаецца да 7 тыс. тон, таму без добрай дапрацоўкі зерня нельга дасягнуць аптымальных тэрмінаў уборкі і здачы дзяржаве. Пры ўводзе ў эксплуатацыю новага комплексу большасць хвалюючых пытанняў знімецца. Увесь сутачны намалот будзе перапрацаваны, што дазволіць засыпаць збожжа на захоўванне на ўласныя фуражныя мэты, падрыхтаваць насенны матэрыял, адгрузіць харчовую збажыну на хлебапрыёмныя пункты. Комплекс з улікам таго, што давялося пракласці 1,8 км газаправоду і добраўпарадкаваць тэрыторыю, абышоўся ў 3,5 млрд рублёў. Аднак падлічана, што на працягу двух гадоў, пры тым, што цэны на збожжа за апошні час стабільныя, комплекс апраўдае сябе. Ніякіх перашкод для паспяховай уборачнай у МАУП “Доктаравічы” няма. Сёлета камбайнавы парк папоўніўся яшчэ адным магутным КЗС-1218 (да чатырох, якія ўжо маюцца).
