30 ліпеня, Капыль /Уласн. iнф./Студэнцкі будаўнічы атрад “Крылы”, створаны па ініцыятыве райкама ГА “БРСМ”, працаваў у гэтым месяцы на рэканструкцыі малочнатаварнай фермы “Быстрыца” ў ААТ “Ціміразеўскі”. У яго склад уваходзілі 12 навучэнцаў першых-другіх курсаў ДУ “Капыльскі дзяржаўны прафесійна-тэхнічны каледж”. Узначальваў атрад майстар вытворчага навучання Віктар Мінец. З першага дня для студэнтаў быў вызначаны фронт работ: добраўпарадкаванне тэрыторыі фермы, устаноўка бардзюраў, бетанаванне, ачыстка памяшкання ад пабелкі і г. д. У гаспадарцы для іх пражывання быў выдзелены добраўпарадкаваны дом, арганізавана трохразовае харчаванне. А для таго, каб пераапрануцца і адпачыць, ёсць спецыяльнае бытавое памяшканне, якое можна назваць сапраўдным штабам студатрада. Дырэктары ААТ “Ціміразеўскі” Аляксандр Турбан і будаўнічага комплексу “БВМ-сэрвіс” Дзмітрый Бычанок адзначылі адказныя адносіны студэнтаў да даручанай справы, іх высокую дысцыпліну, якасць выкананых работ. А таксама выказалі меркаванне, што такіх памочнікаў яны б з радасцю прынялі і ў наступным месяцы.