16 жніўня, Капыль /Уласн. iнф./У раёне праведзены конкурс “Лепшае падвор’е–2012”. Былі прыняты заяўкі з розных куткоў Капыльшчыны, і аўтарытэтнае журы ацаніла кожны гаспадарскі двор. У зале пасяджэнняў райвыканкама адбылося ўзнагароджванне пераможцаў. Лепшым ветэранскім падвор’ем прызнана сядзіба Тамары Аляксандраўны Крэпскай з вёскі Выгода. Участак аформлены аднагадовымі і шматгадовымі кветкамі і дэкаратыўным кустоўем. Ужо шмат гадоў Тамара Аляксандраўна ўзначальвае ветэранскую арганізацыю ЗАТ “Жыліхава”. Другое месца ў конкурсе дасталося Тамары Рыгораўне Лявар з аг. Цімкавічы. Падвор’е ўпрыгожана кветкамі, дэкаратыўным кустоўем. Гаспадыня гэтай сядзібы хоць і на пенсіі, але працягвае працаваць намеснікам дырэктара па гаспадарчай частцы ДУА “Цімкавіцкая СШ”. А вось у асабістым падвор’і Ніны Васільеўны Сівец, якая жыве ў Доктаравічах, заўсёды шмат жывёлы. І цяпер у яе гаспадарцы чацвёра свіней, 30 куранят-бройлераў, 60 курэй. Нягледзячы на гэта, яе падвор’е чыстае і акуратнае. Ніне Васільеўне прысудзілі ганаровае трэцяе месца. Гаспадаром “Гарадскога падвор’я высокай культуры” стаў Эдуард Барысавіч Пацэнкер з Капыля. Разам з жонкай Валянцінай Віктараўнай яны стварылі выдатны эстэтычны шэдэўр – узвялі каплічку перад домам, такой няма ні ў Капылі, ні ў раёне. У конкурсе на “Лепшае сельскае падвор’е” сярод маладых прынялі ўдзел 13 сем’яў Капыльскага раёна. Некаторыя не першы год удзельнічаюць у конкурсе, кожны раз ствараючы нешта новае. У намінацыі “Сам сабе гаспадар” адным з прызёраў стаў Аляксандр Кісялевіч з Канюхоў. Ён гаспадарыць адзін, і гэта ў яго выдатна атрымліваецца. У намінацыі “Мой дом – мая крэпасць” прызёрамі стала сям’я Мялешкаў з Капыля, якія першы раз удзельнічалі ў гэтым конкурсе.
