27 жніўня, Капыль /Уласн. iнф./27 жніўня 2012 г. спаўняецца 360 гадоў атрымання Капылём Магдэбургскага права (адна з найбольш вядомых сістэм гарадскога права, якая склалася ў ХІІІ ст. у нямецкім горадзе Магдэбург). Магдэбургскае права з’явілася юрыдычным замацаваннем поспехаў гараджан у барацьбе за самастойнасць. Яно давала гораду права на самакіраванне і ўласны суд, права зямельнай уласнасці і вызвалення ад большай часткі феадальных павіннасцей. Гэта – адно з важнейшых сведчанняў прыналежнасці Беларусі да агульнаеўрапейскай гісторыі і культуры. Галоўным ініцыятарам надання Капылю Магдэбургскага права быў вялікі князь літоўскі і кароль польскі Ян Казімір Ваза. Ен разам з вольнасцямі надаў Капылю герб: “Далей надаем згаданаму гораду герб – поле залацістае з трубой паляўнічай … згаданым гербам мяшчане Капыльскія як цяперашнія, так і будучыя, могуць пячатацца, а таксама на мяшчанскіх пасведчаннях, лістах закрытых і адкрытых ад магістрата выдаваных, адціскаць, найперш у справах і здзелках, а таксама дэкрэтах судовых, гарадская пячатка павінна зацвярджаць годныя веры рукапісы…”. Герб Капыля з выявай чорнага паляўнічага ражка ў залатым полі ведае кожны капылянін. У якасці афіцыйнага сімвалу горада ён быў зарэгістраваны пад №40 у Гербавым матрыкуле Рэспублікі Беларусь 28 лютага 2000 г. 18—19 кастрычніка 2012 г. адбудзецца навукова-практычная канферэнцыя “Капыль. Праблемы гісторыі горада і рэгіёна (да 360-годдзя выдання прывілея на Магдэбургскае права Капылю)”, арганізатарамі якой з’яўляюцца Капыльскі раённы выканаўчы камітэт, Інстытут гісторыі Нацыянальнай акадэміі навук Беларусі, Гродзенскі дзяржаўны ўніверсітэт імя Янкі Купалы.
