19 верасня, Капыль /Уласн. iнф./На ААТ “Капыльскі масласырзавод” уведзены ў строй кампрэсарны цэх, дзе ў хуткім часе будзе запушчана новая аміячная халадзільная ўстаноўка (АХУ). Аўтаматызацыя вытворчых працэсаў з’яўляецца важнай умовай тэхнічнага прагрэсу любой галіны прамысловасці. Капыльскія перапрацоўшчыкі ўжо даўно ўсвядомілі праблему ахалоджвання сыравіны. Асабліва яна адчувалася ў так званы сезон “вялікага малака” — летне-пашавы перыяд. Цяпер пуск новай кампрэсарнай дазволіць павялічыць перапрацоўку малака ў суткі з 320 (столькі маглі перапрацаваць старыя кампрэсары) да 450 тон. Тым самым значна павялічыцца як эфектыўнасць перапрацоўкі, так і якасць выпускаемай прадукцыі. На рэалізацыю праекта было патрачана 5849 млн рублёў на абсталяванне і 7648 млн рублёў — на будаўнічыя работы, якія ажыццяўляла Капыльскае РБУ. У новай кампрэсарнай маецца яшчэ адзін станоўчы момант — разліковая запраўка аміяку значна паменшыцца. А значыць гэта ўстаноўка прывядзе да зніжэння шкоднага ўздзеяння на навакольнае асяроддзе.