22 кастрычніка, Капыль /Уласн. iнф./КУП “Капыльская ЖКГ” выявіла і адзначыла грашовымі прэміямі пераможцаў конкурсу на лепшы пад’езд і прыдамавую тэрыторыю. Добраўпарадкаванне залежыць не толькі ад улады, але і ад саміх жыхароў горада — на гэтым даўно спрабавала з’акцэнтаваць увагу адміністрацыя жыллёва-камунальнай гаспадаркі. Менавіта таму камунальнікі зацікаўлены ў правядзенні адпаведных конкурсаў. Такое супрацоўніцтва прыносіць свае плады. Па выніках 2011 года г. Капыль па ўтрыманні і тэхнічным стане жыллёвага фонду быў прызнаны лепшым сярод гарадоў падобнай катэгорыі. У конкурсе на лепшую прыдамавую тэрыторыю, які праходзіў у верасні бягучага года, пераможцамі прызнаны жыхары пад’ездаў №4 і 5 па вуліцы Пралетарскай, 39. Мільён рублёў ад адміністрацыі жыллёва-камунальнай гаспадаркі на развіццё прыдамавой тэрыторыі — заслужаная ўзнагарода за іх старанні. Сярод пад’ездаў лепшым прызнаны пад’езд №1 па вул. Партызанскай, 6. Прэмія за ўзорны стан пад’езда склала 500 тысяч рублёў. Добраўпарадкаванне мае на ўвазе не проста высадку дрэў, кветак, чысціню ў пад’ездзе, але і прадуманы дызайнерскі праект, выкананы з улікам шматлікіх фактараў. У пераможцаў сёлетняга конкурсу бясспрэчна атрымалася ўлічыць гэтыя акалічнасці.
