20 лістапада, Капыль /Уласн. iнф./Напрацаваны вопыт Капыльскага філіяла ААТ “Слуцкі сыраробны камбінат”, мадэрнізацыя вытворчасці дазваляюць мэтанакіравана і дынамічна развівацца, заваёўваючы пакупнікоў новай якаснай прадукцыяй. Натуральная малочная прадукцыя капыльскіх вытворцаў па-ранейшаму запатрабавана як на тэрыторыі Рэспублікі Беларусь, так і за яе межамі. Пра гэта яскрава гавораць лічбы: аб’ём вытворчасці ў дзеючых цэнах за 10 месяцаў склаў 125,7% да адпаведнага перыяду мінулага года, а экспарт прадукцыі — 227,6%. Па-ранейшаму высокім спажывецкім попытам карыстаецца прадукцыя капыльскага маслацэха. Да 70% прадукцыі, выпускаемай калектывам цэха, ідзе менавіта на экспарт. Сучаснае імпартнае абсталяванне сырцэха таксама не прастойвае ні хвіліны. За суткі ён выпускае 11 тон прадукцыі. У арсенале сыраробаў тры асноўныя групы сыроў – расійская, галандская і элітная. Што датычыцца апошняй, то яна прадстаўлена сёння сырамі “Гройцер”, “Купаловский”, “Пармезан делюкс” і “Патриарший”. Стабільны даход у агульную капілку масласырзавода прыносіць і цэх сушкі сыроваткі, прадукцыя якога таксама вельмі запатрабавана. За 10 месяцаў бягучага года аб’ём яе выпуску склаў 2215,3 тоны, ці 125,5% да ўзроўню мінулага года.
