14 студзеня, Капыль /Уласн. iнф./Штогод на Шчодры вечар калядоўшчыкі віншуюць жыхароў Семежава і яго гасцей па вайсковай традыцыі XVIII стагоддзя. Абрад “Цары” Семежаўскага Цэнтра культуры і вольнага часу ўваходзіць у спіс аб’ектаў сусветнай нематэрыяльнай спадчыны ЮНЕСКА. Сведкамі гэтага неверагоднага відовішча сталі ў нядзелю семежаўцы і іх госці. Мерапрыемства распачалося з правядзення “Каляднага кірмашу”. Усе прысутныя маглі прыняць удел у калядных гульнях, спартыўных і забаўляльных атракцыёнах, бяспройгрышнай латарэі, набыць сувенірныя вырабы на выставах-продажах, прадэгуставаць стравы беларускай нацыянальнай кухні. Падчас “Каляднага кірмашу” выступілі народны тэатр гульні і гумару “Капыльскія пацехі”, народны ансамбль народнай песні “Спадчына”, удзельнікі мастацкай самадзейнасці Быстрыцкага СДК, фальклорны калектыў “Карані” Любанскага раёна. Выязны гандль даў магчымасць паласавацца духмянымі шашлыкамі і піражкамі, выпіць шклянку гарачага чаю. Удзельнікі Каляднага абраду “Цары” прайшлі па вуліцах Семежава, завіталі да жыхароў, дэманструючы даўні прыгожы абрад і несучы спадзяванні на шчасце і дабрабыт у бягучым годзе.