Наша семежаўская кухня мае даўнюю гісторыю. Самабытныя стравы, якія дайшлі да нас з глыбіні стагоддзяў, сведчаць аб рацыянальнасці, экалагічнасці і разнастайнасці харчавання нашых продкаў. І хаця на сваіх падворках сяляне трымалі жывёлу – мясныя стравы рыхтавалі толькі на святы. У штодзённым жыцці ўжывалі толькі раслінную ежу.
Майстар-клас праводзіць Надзея Сцяпанаўна Пасюкевіч. Рэцэпты страў занатоўваюць Таццяна Шаура, Даша Салановіч і Яна Шчэрба
З мэтай вывучэння культуры, абрадаў, кулінарных традыцый нашай вёскі пры Семежаўскім Цэнтры культуры і вольнага часу было створана клубнае аб’яднанне “Семяжовачка”, у склад якога ўвайшло 12 чалавек. Гэта жанчыны сталага ўзросту Валянціна Міхайлаўна Кіеня і Марыя Мікалаеўна Астапеня, якія ўмеюць гатаваць мясцовыя стравы; жанчыны сярэдняга ўзросту, якія цікавяцца мясцовай кухняй і маюць жаданне навучыцца гатаваць “па-семежаўску” і наш дбайны гаспадар Георгій Мікалаевіч Ціманаў – удзельнік усіх нашых святаў і абрадаў. А кіруе аб’яднаннем дырэктар Цэнтра культуры і вольнага часу Таццяна Ула- дзіміраўна Шаура. Удзельнікі аб’яднання праводзяць семінары, выставы, дэгустацыі, майстар-класы па прыгатаванні мясцовых страў.
У рамках праекта “Жывая гісторыя майго краю” ў ліпені гэтага года адбыўся чарговы майстар-клас на тэму “Прыгатаванне страў семежаўскай кухні”. У мерапрыемстве прымалі ўдзел члены ініцыятыўнай групы, удзельнікі клубнага аб’яднання “Семяжовачка” і падлеткі.
Марына Скамароха, Жэня Сафронаў, Лізавета Калацкая
Майстар-клас праводзілі ў сваіх дамах Надзея Сцяпанаўна Пасюкевіч і Ніна Паўлаўна Рымжа. Яны паказалі, як гатуецца юха, бурачны квас, саладуха, аўсяны кісель і запечаныя яблыкі з цукрам. Усе прысутныя мелі магчымасць самім прыгатаваць гэтыя стравы па тэхналогіі нашых бабуль у печы.
А самы прыемны момант – дэгустацыя прыгатаванага. Усім спадабаўся квас з грыбамі і рыбай, які нельга параўнаць ні з чым.
Дзеці ласаваліся смачнай саладухай з сушаных яблык. А аўсяны кісель трэба есці кожны дзень – ён не толькі смачны, але і вельмі карысны. На дэсерт жа смакавалі запечаныя яблыкі. Усе рэцэпты страў прысутныя занатоўвалі ў сшыткі.
У жніўні пройдзе майстар-клас па выпечцы хлеба і пірагоў. Запрашаем усіх жадаючых наведаць наша мерапрыемства.
КВАС
ад Надзеі Сцяпанаўны Пасюкевіч, 1936 г. н.
У чыгунок на 2 літры крышым 2 буракі, 1 морк-ву, 1 бульбіну, 1-2 цыбуліны, 2-3 жмені сушаных грыбоў, 1 рачную рыбіну, 1 лаўровы лісток, соль, перац, 1 лыжку ячных крупаў або фасолі, заліваем расолам з капусты. Ставім у печ для прыгатавання на 2-3 гадзіны. Падаём як гарачым, так і халодным.
Таццяна ШАУРА,
дырэктар Семежаўскага Цэнтра культуры і вольнага часу
