На зялёным жніве таксама ёсць свае героі. Гэта тыя, хто шчыруе цэлы дзень для таго, каб стварыць багаты запас кармоў. Менавіта да іх днямі накіраваліся намеснік начальніка аддзела ідэалагічнай работы, культуры і па справах моладзі райвыканкама Наталля Гарбацэвіч і старшыня райкама прафсаюза работнікаў АПК Аляксандр Татарыцкі, каб падзякаваць за сумленную працу і адзначыць поспехі лепшых работнікаў. У РСУП “Бабоўня” ў самым прамым сэнсе кіпела праца на палетку, дзе ішла падборка сянажнай масы, таму цырымонія ўшанавання шмат часу не заняла, каб асабліва не парушыць вытворчы працэс. З цёплымі словамі да ўдзельнікаў корманарыхтоўкі акрамя ганаровых гасцей з раёна звярнуліся намеснік дырэктара сельгаспрадпрыемства па ідэалагічнай рабоце Галіна Самусенка, старшыня Бабаўнянскага сельвыканкама Ірына Запольская і самадзейныя артысты Лоцвінскага СДК. Асаблівыя словы ўдзячнасці былі адрасаваны маладому механізатару Дзмітрыю Клочку, на рахунку якога ўжо звыш 1400 тон падабранай сянажнай масы. — Абавязкова раз у тыдзень, а то і часцей, мы выязджаем на палеткі з міні-канцэртам, каб павіншаваць нашых перадавікоў, — гаворыць мастацкі кіраўнік Дома культуры Галіна Дрожжа. — Мы дорым нашым героям своеасаблівыя “Віншавальныя паштоўкі”. Разам з мясцовай бібліятэкай праводзім інфармацыйныя хвілінкі. Стараемся аказаць хоць маленькую ўвагу. Хлопцы заўсёды сустракаюць з радасцю, дзякуюць за тое, што скажам прыемнае слова, прынясём добрую навіну. Яшчэ адзін бабаўнянскі герой — Аляксандр Званковіч — у дзень нашага наведвання прыйшоў на дапамогу ў суседнюю гаспадарку — ААТ “Прагрэс 2010”. — Згодна з распараджэннем старшыні райвыканкама было вырашана аказваць дапамогу тым сельгаспрадпрыемствам, дзе не хапае тэхнікі ці працоўнай сілы. Вось такім чынам і апынуўся ў нас Аляксандр Званковіч, — адзначае дырэктар ААТ “Прагрэс 2010” Валерый Тароцька. — Дарэчы, Аляксандра Рыгоравіча я ведаю даволі даўно, яшчэ па працы ў РСУП “Бабоўня”. Ён адказны, сумленны спецыяліст, таму нездарма яму давяраюць новую тэхніку. Вось і на нашых палетках літаральна за дзень ён запрасаваў у сетку амаль 200 рулонаў якаснага сена. У КСУП “С “Лясное” віншаванні з працоўнай перамогай і пажаданні далейшых поспехаў у працы прымалі механізатар Міхаіл Кісель, які не адзін год паказвае добрыя вынікі на корманарыхтоўцы, і прадстаўнік маладога пакалення Сяргей Ліпай. Заслугі ўсіх лідараў адзначаны памятнымі вымпеламі пераможцаў спаборніцтва і падарункамі
