Хлебаробы Капыльскага раёна першымі на Міншчыне намалацілі 100 тысяч тон збожжа новага ўраджаю. Гэту падзею не пакінулі без увагі лідары прафсаюзнага руху вобласці і прадстаўнікі сродкаў масавай інфармацыі. У панядзелак у раён наведаліся старшыня Мінскага абласнога аб’яднання прафсаюзаў Віктар Маліноўскі, карэспандэнты “СТБ” і газеты “Мінская праўда”. На палетках ААТ “Піянер-Агра” — гаспадаркі, якая паказвае самую высокую ўраджайнасць, — Віктар Тадэвушавіч уручыў прывітальны адрас старшыні райвыканкама Анатолю Жданеню, а таксама Падзякі, грашовыя прэміі і сувеніры членам маладзёжнага экіпажа ў складзе Алега Леановіча і Аляксандра Гірко, а таксама кіраўніку гаспадаркі Аляксандру Макарчуку. Такія ж узнагароды ад аб’яднання прафсаюзаў атрымаў сямейны экіпаж з ААТ “Скабін”: тут віншавалі з высокімі дасягненнямі Аляксандра і Таццяну Грынкевічаў.
