Старэйшынай вёскі
павінен быць чалавек актыўны. Без яго ўдзелу не абыходзіцца ніводная справа ў
населеным пункце. Клопатаў у прадстаўнікоў мясцовага самакіравання нямала, хоць
абавязкі свае старэйшыны выконваюць на грамадскіх пачатках. Яны — першыя
памочнікі старшыні сельвыканкама і проста чулыя людзі з добрым сэрцам,
перажываюць за праблемы аднавяскоўцаў, добраўпарадкаванне населеных пунктаў,
пытанні жыццезабеспячэння.
Вось і пра старэйшыну
вёскі Русакі, дэпутата сельскага Савета Алену Фяткевіч, мясцовыя жыхары
адзываюцца, як пра неабыякавага і мудрага чалавека. У яе заўсёды знойдзецца
слова, каб падбадзёрыць пажылога і даць слушную параду маладому. Добрыя
арганізатарскія здольнасці дапамагаюць наладзіць грамадскія справы.
Старэйшая вёскі Русакі Алена Фяткевіч гутарыць з
аднавяскоўцамі
У рабоце з людзьмі
старэйшыне дапамагаюць багаты працоўны вопыт і ўменне ладзіць з людзьмі. Многа
гадоў Алена Вячаславаўна працуе ў Русакоўскім магазіне. Згадзіцеся, для вёскі —
гэта адно з самых важных грамадскіх месцаў. Сюды наведваюцца амаль усе жыхары.
Тут жа яны дзеляцца навінамі, выказваюць свае праблемы і пажаданні.
— Такім чынам, дзякуючы майму асноўнаму занятку
падтрымліваю сувязь з аднавяскоўцамі. З некаторымі яшчэ звязваемся па тэлефоне.
Людзі ў нас добрыя, актыўныя, з разуменнем ставяцца да просьбаў папрацаваць
разам на суботніку, навесці парадак у грамадскіх месцах, — гаворыць Алена
Фяткевіч. — Увесну ў нас галоўная задача — добраўпарадкаванне, навядзенне
парадку на прысядзібных участках. Зімой — асвятленне вуліц. Да рэлігійных
святаў — уборка могілак і г.д.
Узнікаюць праблемы з
электраэнергіяй, рамонтам дарог — і тут у першую чаргу звяртаюцца да
старэйшыны. А ўжо потым яна накіроўвае зварот у вышэйшыя інстанцыі.
Сёлета працягваецца
газіфікацыя Русакоў. І гэтая справа не абышлася без удзелу Алены Вячаславаўны.
Члены кааператыву аказалі ёй давер весці бухгалтарскую работу. Такім чынам, у
дамах сарака вяскоўцаў ужо ёсць ці ў хуткім часе з’явіцца блакітнае паліва. І
гэта яшчэ адзін крок, каб пражыванне ў вёсцы было больш зручным. Але разам з
тым не ўсё створана для камфортных умоў: у населеным пункце пакуль што не пракладзены
водаправод. Пытанне даволі надзённае і патрабуе вырашэння.
Хацелася б адзначыць, што аднавяскоўцы
падтрымліваюць і паважаюць старэйшыну, бо бачаць яе жаданне прынесці карысць
грамадству.
