Дваццацішасцігадовы Яўген
Давыдзенка з аграгарадка Пацейкі — прыклад менавіта той моладзі, якая ведае,
дзе і як можна знайсці сабе прымяненне. Ён не праседжвае дні і ночы за
камп’ютарам ці займаецца якой-небудзь непатрэбшчынай, а накіроўвае свае сілы і
ўменні на ўладкаванне аграсядзібы.
Як прызнаўся Яўген, стварыць
нешта прыгожае ў сваім населеным пункце яму хацелася даўно. Яшчэ ў юнацкія
гады, часта праязджаючы па цэнтральнай вуліцы аграгарадка, звярнуў увагу на
адзін з закінутых дамоў. Здавалася б, што цікавага можа быць у старой пабудове,
зарослым зямельным участку? Аднак жаданне зрабіць тут прыгажосць перамагло. У
хуткім часе гэта сядзіба была набыта. Спачатку яна была ачышчана ад кустоўя,
старых дрэў. Потым пачалося будаўніцтва лазні, альтанак, вадаёмчыка. Да гэтай
пары яшчэ працягваецца абсталяванне дома: пракладзены камунікацыі, у хуткім
часе з’явяцца ванны пакой і туалет.
Асаблівай адметнасцю
аграсядзібы можна назваць тое, што гаспадар усё стварае сваімі рукамі. А
матэрыяламі для яго работы пераважна становяцца дрэва і камень. Яўген ужо
вырабіў стол, табурэткі, барную стойку, лесвіцу на другі паверх, зараз працуе
над аздабленнем печкі. Галоўнае, што ад усяго гэтага малады гаспадар атрымлівае
надзвычайную асалоду. Яшчэ адна адметнасць — усе матэрыялы і работы
выконваюцца за ўласныя сродкі, дакладней, па меры іх паступлення, без
выкарыстання крэдытаў. Як запэўнівае Яўген, у наступным годзе сядзіба
паўнацэнна зможа прымаць наведвальнікаў. А пакуль жа тут гасцямі бываюць родныя
і сябры. Папулярнасцю ў дзяцей карыстаюцца арэлі, гульнёвыя пляцоўкі, вадаём.
Дарослыя ж аддаюць перавагу лазні са спецыяльна нарыхтаванымі венікамі, з сапраўднай
парай з лекавымі раслінамі і духмянай гарбатай з самавара. Таксама ў
перспектыве — добраўпарадкаванне тэрыторыі насупраць сядзібы, дзе паблізу
сажалка, на якой можна парыбачыць, поле і луг, дзе можна выкарыстоўваць
квадрацыклы. Адным словам, ёсць усё для аказання шырокага спектра паслуг.