Пярвічная
прафсаюзная арганізацыя ААТ «Капыльскі райаграсэрвіс» — адна з самых шматлікіх
і лепшых у раёне.
У райаграсэрвісе развіта
практыка сацыяльнага партнёрства. Прафсаюзны камітэт цесна супрацоўнічае з
адміністрацыяй на чале з дырэктарам Анатолем Чаркасом. Сумесна разглядаюцца
вытворчыя пытанні, па ахове і рэжыме працы. На прадпрыемстве створана камісія,
якая кантралюе выкананне калектыўнага дагавора. Члены прафкама вырашаюць
сацыяльна-бытавыя пытанні, займаюцца культурна-масавай,
фізкультурна-аздараўленчай і выхаваўчай работай.
Анжэла Канончык (у цэнтры) з
прафсаюзнымі актывістамі
Пра арганізацыю работы пярвічкі
гутарым са старшынёй прафсаюзнай арганізацыі райаграсэрвісу Анжэлай Канончык,
якая ўзначальвае яе ўжо пяць гадоў.
«Наша пярвічка — гэта звыш 400
чалавек (сюды ўваходзяць і работнікі сельгасфіліяла «Руднае»), — расказвае
Анжэла Іванаўна. — Вядома, у калектыве людзі з рознымі перакананнямі і
прынцыпамі, рознага ўзросту, але мы заўсёды ўмеем прыйсці да згоды. Нас усіх
аб’ядноўвае прафсаюз. Менавіта ён стаіць на абароне нашых правоў і сацыяльных
гарантый. У нашых радах знаходзяцца людзі, неабыякавыя да лёсу роднай краіны.
Вось і зараз, у перыяд важнай палітычнай кампаніі, многія з нашых членаў
уваходзяць у склад участковых выбарчых камісій, з’яўляюцца назіральнікамі.
Пераканана, што члены прафсаюза зробяць свой выбар, каб наша Беларусь квітнела
і развівалася».
Адным з асноўных кірункаў работы
прафкама райаграсэрвісу з’яўляецца арганізацыя грамадскага кантролю за станам
аховы працы, за тэхнікай бяспекі. Таму тут імкнуцца стварыць спрыяльныя ўмовы
для працы і адпачынку. Эфектыўны прафсаюзны кантроль на прадпрыемстве і за
захаваннем працоўнага заканадаўства. З гэтай мэтай створана камісія па ахове
працы, працуюць грамадскія інспектары.
Увогуле ў калектыве жыццё
дастаткова насычанае. Работнікі прадпрыемства прымаюць удзел у раённых
спаборніцтвах па розных відах спорту і добра там выступаюць, пра што сведчаць
шматлікія граматы і дыпломы. Для падтрымання добрай фізічнай формы за кошт
прафсаюзных узносаў набываюцца абанементы на наведванне
фізкультурна-аздараўленчага комплексу. Таксама набываюцца білеты на наведванне
разнастайных канцэртаў, што праходзяць у Капылі, арганізоўваюцца паездкі па
славутых мясцінах Беларусі, а таксама ў тэатры і цырк. Прафсаюзная арганізацыя
асаблівую ўвагу ўдзяляе ветэранам працы. Тут створана ветэранская арганізацыя.
Прадпрыемства дапамагае былым работнікам, іх віншуюць з прафесійнымі і
дзяржаўнымі святамі. Таксама ў дні юбілеяў і нараджэння не застаюцца без увагі
і тыя, хто працуе зараз.
«Задача прафсаюза — быць
падтрымкай кожнаму працаўніку, — гаворыць Анжэла Іванаўна. — Над вырашэннем
гэтай задачы мы і працуем».
