Міністр
працы і сацыяльнай абароны Рэспублікі Беларусь Мар’яна Шчоткіна правяла прыём
грамадзян у Капыльскім райвыканкаме. Мар’яна Акіндзінаўна пракаменціравала
пытанні, з якімі да яе звярталіся нашы землякі.
Як адзначыла міністр, прыём быў
даволі ажыўленым. У асноўным пытанні датычыліся працаўладкавання, умоў працы і
пенсійнага забеспячэння. Усе яны індывідуальныя, і іх вырашэнне залежыць перш
за ўсё ад умення самога чалавека арыентавацца ў тых умовах, у якіх ён працуе.
— Напрыклад, у адным выпадку мы
дамовіліся, што дапаможам працаўладкавацца маладому чалавеку, які трапіў у
няпростую жыццёвую сітуацыю, — заўважыла Мар’яна Акіндзінаўна. — Безумоўна, у
многім ён вінаваты і сам, але, калі ў чалавека ёсць жаданне выправіцца, яму
неабходна даць такую магчымасць. Яго неабходна падтрымаць.
Адна заява наконт пенсійнага
забеспячэння накіравана для разгляду ў камітэт па працы і сацыяльнай абароне
Мінаблвыканкама.
— Таксама гэты прыём паказаў,
што трэба ўмець слухаць адзін аднаго, не ствараць нейкія канфліктныя сітуацыі,
знаходзіць шляхі іх вырашэння, — адзначыла Мар’яна Шчоткіна. — Калі канфлікт
узнік паміж кіраўніком і працаўніком, за яго ўсё роўна адказвае кіраўнік, бо ён
пастаўлены на гэту пасаду для прыняцця рашэнняў. Адносіны павінны быць заўсёды
спакойныя, добразычлівыя, але і патрабавальныя. Калі мы наймаемся на працу, мы
прадаём сваю працоўную сілу і гарантуем, што будзем выконваць ускладзеныя
службовыя абавязкі. У сваю чаргу наймальнік не павінен зневажаць ці абражаць
работніка. З абодвух бакоў павінны быць супрацоўніцтва і згода.
У дзень прыёму таксама была
наведана ДУ «Капыльскі ТЦСАН». Рабоце ўстановы была дадзена высокая ацэнка.
Аднак памяшканне крыху цеснаватае. Таму па даручэнні міністра з абласнога
бюджэту будуць выдзелены сродкі на рэканструкцыю будынка, што знаходзіцца побач
з ТЦСАН.
— Вельмі важна, у якіх умовах
знаходзяцца людзі, — рэзюмавала Мар’яна Шчоткіна. — Пабываўшы на Капыльшчыне,
хачу адзначыць, што раён даволі чысты, добраўпарадкаванне нельга не заўважыць
нават напярэдадні зімы. І ўвогуле мы павінны берагчы сваю зямлю і людзей, якія
на ёй жывуць.
