Сустрэчы
з выбаршчыкамі ў акрузе дазваляюць дэпутату, вобразна кажучы, трымаць руку на
пульсе часу, ведаць, чым жывуць людзі, што іх хвалюе. Пасля чарговага прыёму
грамадзян у Капыльскім райвыканкаме мы сустрэліся з дэпутатам Палаты
прадстаўнікоў Нацыянальнага сходу Рэспублікі Беларусь Анатолем Бойкам і
пацікавіліся, чым быў адметны для яго мінулы год у рабоце са зваротамі
насельніцтва.
— Я
з’яўляюся дэпутатам па Капыльскай выбарчай акрузе № 66, у склад якой уваходзяць
Капыльскі, Клецкі і частка сельсаветаў Слуцкага раёна, — адзначыў Анатоль
Бойка. — За 2015 год мною праведзена 25 прыёмаў, зарэгістравана 68 зваротаў, у
тым ліку ў Слуцкім раёне тры прыёмы, шэсць зваротаў, у Капыльскім, адпаведна,
11 і 19, у Клецкім — 11 і 43. У адпаведнасці з графікам работы рэгулярна
выязджаю ў сваю акругу. Практыкую сустрэчы з людзьмі не толькі ў райцэнтрах,
але, як кажуць, і ў глыбінцы. Бо не ўсе выбаршчыкі па розных прычынах могуць дабрацца
ў горад. А праблем хапае паўсюдна. І нярэдка такіх, якія з’яўляюцца агульнымі
для жыхароў усяго рэгіёна. Напрыклад, летась на Капыльшчыне на вёсцы праведзены
прыёмы ў ААТ «Піянер-Агра», Пацейкаўскім, Грозаўскім, Капыльскім сельсаветах, у
Капыльскім дзяржаўным каледжы, астатнія — у райвыканкаме ці гарадскіх
арганізацыях і прадпрыемствах.
Што
тычыцца пытанняў, то яны самыя розныя. Ёсць такія, па якіх дастаткова даць
тлумачэнне ці параіць чалавеку, што ў дадзеным выпадку патрэбна яму зрабіць. А
ёсць і іншага характару — тут неабходна ўсебакова вывучыць, атрымаць тлумачэнні
ў пэўных інстанцыях, прааналізаваць, наколькі яны абгрунтаваныя. Аднак
найбольшую ўдзельную вагу маюць звароты,
вырашэнне якіх так ці інакш звязана з дзейнасцю ці бяздзейнасцю мясцовых
арганізацый і структур. У такім разе мы гэтыя праблемы абмяркоўваем і шукаем
шляхі іх вырашэння з кіраўніцтвам раёнаў, адказнымі работнікамі райвыканкамаў
ці кіраўнікамі прадпрыемстваў і арганізацый.
Большасць
праблем, што ўзнімаюцца ў зваротах грамадзян, якія жывуць на тэрыторыі ўсёй
акругі, носіць, так бы мовіць, бытавы характар. Некаторыя звяртаюцца, каб
адрамантавалі лінію электраперадачы ці ўключылі вулічнае асвятленне, спілавалі
аварыйнае дрэва, дапамаглі разабрацца ў канфлікце з суседзямі. Шэраг пытанняў
узнімалася і наконт унясення паправак і змяненняў у існуючае заканадаўства.
Уносіліся таксама прапановы, якія мэтазгодна выкарыстаць пры распрацоўцы новых
заканадаўчых актаў. Такім чынам, грамадзяне шукаюць дапамогі, у тым ліку, і ў
дэпутата. Усе пытанні бяруцца на кантроль і сумеснымі намаганнямі праблемы па
магчымасці вырашаюцца.
Сяргей
КОЗЕЛ
Фота
Сяргея ЛАЗОЎСКАГА
«СП»