Першымі
на Капыльшчыне пасяўныя агрэгаты вывелі на палі хлебаробы ААТ «Старыца-Агра» —
на гэтым тыдні тут пачалася сяўба аўса.
— Ранні тэрмін сяўбы заўсёды
апраўдвае сябе: мы штогод атрымліваем добры ўраджай. Народная мудрасць «Сей
авёс у гразь — будзеш князь!» актуальна як ніколі, бо зямля за лічаныя дні можа
высахнуць. Пакуль у глебе ёсць вільгаць, мы паспяхова справіліся з гэтай
задачай, — расказвае намеснік дырэктара сельгаспрадпрыемства Аляксандр Логіш. —
І ўжо пасеялі неабходныя 150 га аўса. Наперадзе сяўба ячменю,
зернебабовых, цукровых буракоў, бульбы, кукурузы і іншых культур.
Самыя прыдатныя на дадзены
момант глебы для сяўбы — пясчаныя і на тарфяніках. Менавіта там на
энерганасычаных трактарах сеялі авёс гатунку «стралец» механізатары Сяргей
Дубовік і Васіль Чабатароў. Як адзначае Аляксандр Логіш, глеба на гэтых
участках фізіялагічна гатова: ужо крыху прагрэлася і спрыяе сяўбе.
Акрамя таго, у гаспадарцы
актыўна вядзецца падрыхтоўка плошчаў пад будучую сяўбу яравых і пасадку бульбы,
вывазка і ўнясенне арганікі на палеткі, раскідванне мінеральных тукаў, агрэгаты
«Раса» падкормліваюць азімыя, вядзецца збор камянёў. Безумоўна, ідуць і іншыя
работы.
Працоўны дзень арганізаваны ў
адпаведнасці з графікам вясенняй пасяўной. Пачынаецца ён у сем раніцы і
доўжыцца да сямі вечара, а то і пазней. Забяспечаны абавязковы падвоз
механізатараў на палеткі і дамоў.
Для стараннай працы сваім
работнікам у ААТ «Старыца-Агра» імкнуцца стварыць усе ўмовы. Перад пачаткам
веснавых палявых работ, як адзначыў Аляксандр Логіш, была распрацавана сістэма
аплаты, праведзены сход з механізатарамі.
— Кожную раніцу эканамісты
знаёмяць іх з вынікамі папярэдняга дня, раздаюць разліковыя лісткі, — падкрэслівае
Аляксандр Леанідавіч. — Правялі пазачарговы інструктаж па ахове працы, дзе
ўсіх, хто будзе заняты на пасяўной, пазнаёмілі з правіламі бяспечнага вядзення
работ. Раніцай усе механізатары і вадзіцелі праходзяць медыцынскі агляд,
праверку алкатэстарам. Гэта ўжо адладжаны працэс.
Арганізавана гарачае харчаванне
ўдзельнікаў пасяўной — абеды гатуюць у мясцовай сталовай, і спецыяльна
абсталяваныя машыны двойчы на дзень развозяць іх па палетках. Не забываюць у
гаспадарцы і пра ідэалагічнае забеспячэнне пасяўной: з першага дня сяўбы
падводзяцца вынікі спаборніцтва. У ліку лідараў зараз Васіль Чабатароў.
Механізатар
Васіль Чабатароў
Памочнік
начальніка ўчастка № 4 Наталля Кандыбовіч і намеснік дырэктара Аляксандр Логіш
На
падрыхтоўцы глебы — Аляксей Ліннік
Сяргей
КОЗЕЛ
Фота
Сяргея ЛАЗОЎСКАГА
Услед за тэхнікай ААТ
«Старыца-Агра» сеяць раннія збожжавыя і зернебабовыя культуры выйшлі ў ААТ
«Піянер-Агра», «Семежава» і ЗАТ «Жыліхава». У той жа дзень сяўбу аднагадовых
траў распачалі ў ААТ «Ціміразеўскі» і КСУП «Доктаравічы».
Па стане на 1 красавіка ў
сельгаспрадпрыемствах раёна пасеяна 619 га ранніх яравых культур.
«СП» http://www.kopyl.by
