Самадзейныя
артысты Капыльшчыны на сцэне раённага Цэнтра культуры прадэманстравалі творчыя
дасягненні падчас правядзення XVIII абласнога агляду «народных» і «ўзорных»
аматарскіх калектываў. Агляд праводзіўся Мінскім абласным цэнтрам народнай
творчасці з мэтай пацвярджэння ганаровага звання «народны». Журы, якое
ўзначальвала дырэктар Мінскага абласнога цэнтра народнай творчасці Раіса
Вайцяхоўская, на працягу мерапрыемства ацэньвала прадстаўленыя выступленні.
Музыку не трэба бачыць: яе трэба
чуць. Але калі назіраеш за тым, як гукі ідуць да слухача, разумееш: каб мелодыя
пайшла ў жыццё, патрэбна шмат майстэрства.
Вось на сцэне гучаць джазавыя
кампазіцыі ў выкананні ўзорнага эстраднага аркестра (мастацкі кіраўнік Леў
Канаплянік) Капыльскай дзіцячай школы мастацтваў. Кожны нумар гледачы
сустракалі сапраўдным шквалам апладысментаў і крыкамі «Брава!». У калектыву за
час свайго існавання шмат дасягненняў, пра якія мы неаднойчы расказвалі
на старонках газеты.
Джазавы аркестр
Адметнасць народнага
вакальна-інструментальнага ансамбля раённага Цэнтра культуры «Замкавая гара» ў
тым, што з першых дзён існавання ўдзельнікі прапагандуюць свае аўтарскія творы.
«Музыка Андрэя Раеўскага (а менавіта ён і з’яўляецца мастацкім кіраўніком
ансамбля), словы Аляксея Вайцешака», — менавіта так аб’яўлялі кожную
кампазіцыю. Дарэчы, у мінулым годзе калектыў атрымаў Дыплом І ступені за лепшы
песенны твор на абласным конкурсе самадзейных паэтаў і кампазітараў «І страфой,
і тактам».
«Замкавая гара»
Выступленні народнага аркестра
народных інструментаў «Капыльскія дудары» пад кіраўніцтвам Святланы Салавей
вядомы далёка за межамі не толькі нашага раёна, але і краіны. І кожны раз, калі
са сцэны льюцца меладычныя гукі беларускіх народных інструментаў, у пачуццях і
думках нібыта вяртаешся ў мінулае.
«Капыльскія дудары»
— Песні, якія выконвае народны
ансамбль народнай песні «Спадчына», закранаюць найтанчэйшыя струны душы, —
аб’яўляюць наступных выканаўцаў вядучыя (навучэнцы гарадскіх школ) Дар’я
Заварзіна і Максім Почапень. — Яны даносяць да кожнага прыгажосць музычнай
творчасці.
Нельга не згадзіцца са словамі
вядучых, таму што сапраўдная народная песня здольна прымусіць сумаваць і
радавацца, плакаць і смяяцца. Адметна, што аўтарам слоў адной з кампазіцый стаў
наш зямляк Мікалай Майсюк, а музыкі — канцэртмайстар ансамбля Аляксандр
Карповіч. Бяззменным мастацкім кіраўніком ансамбля з’яўляецца Валянціна Зарамбоўская.
«Спадчына»
І зноў нельга аспрэчваць словы
вядучых (толькі ўжо дарослых) Сяргея і Кацярыны Мялешкаў аб тым, што самы
выдатны інструмент — голас. Нішто не параўнаецца з ім па выразнасці і глыбіні.
А калі голас не адзін, калі некалькі гэтых цудоўных інструментаў зліваюцца ў
ансамблі і гучаць як адзіная, добра настроеная струна, тады мелодыю, якая
атрымалася, можна назваць сапраўдным чараўніцтвам. Дакрануцца да гэтай яскравай
прыгажосці гукаў дапамагалі салісткі народнага вакальнага ансамбля «Аліра».
Дарэчы, калектыў — пастаянны ўдзельнік міжнародных, рэспубліканскіх і абласных
фестываляў і конкурсаў. Кіраўніком ансамбля з’яўляецца Таццяна Хілько.
«Аліра»
А вось лірычныя кампазіцыі, якія
прагучалі падчас выступлення вакальнага ансамбля «Дабрадзеі», прымусілі і крыху
пасумаваць, і павесяліцца. Гэта выступленне — крок да ўдзелу ў абласным
фестывалі ветэранскіх калектываў «Не старэюць душой ветэраны», які адбудзецца
16 красавіка ў г. Смалявічы. Знаходзіць цікавыя музычныя кампазіцыі і адточваць
выканальніцкае майстэрства дапамагае мастацкі кіраўнік ансамбля Валянціна
Зарамбоўская.
З’яўленне на сцэне наступных
выканаўцаў падказала: сувязь пакаленняў — рэч моцная і вартая. Так, талент і
творчая спадчына перадаюцца ад старэйшых больш маладзейшым. Студыя эстраднага
вакалу «Кліо», што створана пры дзяржаўнай установе дадатковай адукацыі «Цэнтр
творчасці дзяцей і моладзі Капыльскага раёна» ў гэты вечар змагалася за прысваенне
звання «ўзорны». Удзельнікі (а дакладней прыгожыя ўдзельніцы) пастаянна
выступаюць на творчых фестывалях і конкурсах рознага ўзроўню. Знаходзіць і
развіваць творчыя здольнасці дзяўчатам дапамагае таленавіты педагог Таццяна
Ермаловіч. У склад студыі ўваходзяць вакальны ансамбль «Элегія», дуэт «Чамучкі»
і інш. Самай юнай удзельніцы Вікторыі Жогаль споўнілася пяць гадоў. Зусім
нядаўна Вікторыя стала дыпламантам міжнароднага конкурсу-фестывалю мастацтваў
«Музыки свет».
І калі гледачы (а іх, дарэчы, прыйшло
на канцэрт шмат) маглі адпачыць і адчуць асалоду ад музыкі, то членам журы
прыйшлося папрацаваць. Як вынік — вердыкт: «Высокае званне «народны» —
пацверджана!». Але прадаставім слова старшыні журы.
Раіса
ВАЙЦЯХОЎСКАЯ:
«Капыльскі
раён заўсёды адрозніваўся: тут прадстаўлена шмат жанраў не падобных адзін на
аднаго. Гэта і «Замкавая гара», якая выконвае сапраўдны рок, і ансамблі
народнай песні і музыкі, і эстрадныя выканаўцы. Дарэчы, «Замкавая гара» актыўна
супрацоўнічае з клубам кампазітараў і паэтаў «Жывіца» і прапагандуе аўтарскія
творы, а яе кіраўнік Андрэй Раеўскі займае актыўную творчую пазіцыю. Сёння мы з
задавальненнем слухалі і «Капыльскіх дудароў». Мастацкі кіраўнік калектыву
Святлана Салавей шукае новыя формы, рознабаковыя падыходы як да падбору
рэпертуару, так і да выканання. Асобных слоў заслугоўвае эстрадны джазавы
аркестр. Дзякуючы самаадданасці Льва Канапляніка юныя музыкі прымалі ўдзел у
самых разнастайных конкурсах і фестывалях. «Спадчына» парадавала нас тым, што
значную ролю сталі адыгрываць мужчыны-выканаўцы. Не магу не адзначыць і
песенную пяшчоту артыстак з «Аліры». Вельмі прыемна было бачыць і чуць калектыў
студыі эстраднага вакалу «Кліо», які змагаўся за прысваенне звання «ўзорны».
Дарэчы, такіх рознаўзроставых саставаў у вобласці мала. І, канешне, мы станоўча
ацэньваем выступленне, таму што сёння ўбачылі і пачулі вельмі цікавыя нумары.
Ды наогул кожны калектыў можа прадставіць самастойную канцэртную праграму. Пры
пастаноўцы нумароў мы бачым харэаграфічнае афармленне, лагічную выстраенасць і
адсутнасць статычнага спявання. Такое творчае развіццё — сведчанне плённага
ўзаемадзеяння і з аддзелам ідэалагічнай работы, культуры і па справах моладзі
райвыканкама, і асабіста з яго начальнікам Наталляй Царковай, і з дырэктарам
РЦК Наталляй Рыбак. Склалася вельмі моцная каманда. У развіццё культуры
Мінскага рэгіёну творчы ўклад уносіць Любоў Галубовіч, якую мы запрашаем да
ўдзелу ў абласных і рэспубліканскіх мерапрыемствах. Не застаюцца ўбаку
Валянціна Зарамбоўская і Таццяна Хілько. Добрых слоў варты і вядучыя
мерапрыемства як дарослыя: Кацярына і Сяргей Мялешкі, так і
навучэнцы: Дар’я Заварзіна і Максім Почапень. Хочацца пажадаць усім калектывам
захоўваць свае творчыя саставы. І яшчэ — каб на Капыльшчыне больш развіваўся
харэаграфічны жанр.
Падрыхтавала
Дзіяна ТКАЧЭНКА
Фота
аўтара
«СП» http://www.kopyl.by