Заўсёды
цікава здзяйсняць вандроўкі ў мінулае. Чаму? Адказ на гэта пытанне я атрымала
падчас наведвання Капыльскага раённага краязнаўчага музея, дзе праходзіць
выстава, якая так і называецца «Па хвалях памяці».
І
асабліва актуальна правядзенне выставы зараз, у аб’яўлены Прэзідэнтам Год
культуры.
У дзіцячым закутку ўтульна
Давайце пройдземся па
выставачнай зале разам з дырэктарам музея Валянцінай Шураковай. Дзякуючы яе
апантанасці і энтузіязму мы маем магчымасць на свае вочы пабачыць свет, у якім
яшчэ паспелі пажыць і самі, у якім жылі нашы бабулі і матулі.
У ліку экспанатаў — рэчы з эпохі
СССР. Кожная з іх — частка нашай гісторыі. Не памылюся, калі скажу, што кожны
экспанат — гэта своеасаблівы дызайнерскі праект, у вытворчасці якога прымала
ўдзел уся краіна.
— Звярніце ўвагу, — расказвае
Валянціна Шуракова, — кожная вітрына аформлена накшталт вітрыны магазіна. Вось
тут змешчаны цацкі: добрыя, вельмі чалавечныя, яны дапамагалі выхоўваць
названыя якасці і ў дзяцей. Гэта — «аддзел» галантарэі: парфумерны набор
«Гвоздика» (адэкалон і духі), набор «Весенний» і зараз не згубілі свой арамат,
а пацеркі і жаночыя панчохі зусім як новыя. Далей — вырабы з фарфору. І,
заўважце, усё зроблена якасна і прывабна. А вось аб прызначэнні гэтай тэхнікі
нашы маленькія наведвальнікі нават і не здагадваюцца: бабінны і касетныя
магнітафоны выклікаюць у іх воклічы здзіўлення. Зазірніце сюды: гэта куток
сапраўднага ранейшага фатографа — тут змешчаны прылады, з дапамогай якіх рабілі
здымкі.
Магнітафоны, тэлевізар, радыё —
усё зусім, як раней
А здымкі ў савецкі час рабілі
цікавыя. Аб гэтым распавядаюць стэнды, дзе змешчаны крыху пажаўцелыя фота: вось
хлопчыкі ў вышыванках, а гэта камсамольскае вяселле, побач — праводзіны ў
армію. Глядзіш — і робіцца крыху сумна: куды дзелася тая душэўнасць, з якой
людзі ставіліся адзін да аднаго?..
Так, на выставе змешчана шмат
экспанатаў, аб прызначэнні якіх прадстаўнікам маладога пакалення будзе цікава
даведацца: плеценая авоська, куды месцілася шмат пустых бутэлек з-пад кефіру,
купоны, за якія ў перыяд 80-90 гадоў ХХ стагоддзя можна было набыць неабходныя
рэчы, папярэднік сучаснай вылічальнай тэхнікі — арыфмометр і яшчэ шмат чаго. А
вось аб тым, як выглядалі пакоі ў кватэры або хаце, можна ўбачыць у тэматычных
кутках. Таму, калі вы наведаеце выставу, то з цікавасцю зазірнеце ў мінулае.
Паверце, толькі азірнуўшыся назад, можна з упэўненасцю гля-дзець наперад.
І яшчэ. Калі ў вас захоўваюцца
старадаўнія рэчы, занясіце іх у музей. Так вы не толькі захаваеце спадчыну, але
і добрую памяць пра сябе.
Дзіяна
ТКАЧЭНКА
Фота
аўтара
«СП» http://www.kopyl.by
