Першая
палова мая ў гэтым годзе для калектыву рэдакцыі газеты «Слава працы» выдалася
сапраўды яркай і насычанай. Упершыню наша выданне было адзначана ў самым
прэстыжным журналісцкім конкурсе: стала лаўрэатам ХІІ Нацыянальнага конкурсу
друкаваных сродкаў масавай інфармацыі «Залатая Літара» ў намінацыі «Лепшыя
матэрыялы грамадска-палітычнай тэматыкі». Узнагароду атрымала галоўны рэдактар
Марыя Шэіна падчас правядзення ХХ Міжнароднай спецыялізаванай выставы «СМІ ў
Беларусі».
З цікавасцю да нашай газеты
Такая ўзнагарода — вынік
стараннай працы ўсяго калектыву. Кожны з супрацоўнікаў імкнецца выконваць свае
абавязкі на высокім узроўні. Гэтак жа, як і на працягу ўсіх 86 гадоў існавання
раёнкі. Якасная і аператыўная інфармацыя — гэта наша традыцыя.
Такой жа традыцыйна цікавай для
наведвальнікаў выставы «СМІ ў Беларусі» стала і прэзентацыя нашай раённай
газеты. Некалькі гадоў таму супрацоўнікі «Слава працы» разам з музыкантам
Аляксандрам Булакевічам, як кажуць, задалі добры тон і паказалі, як трэба цікава
прэзентаваць сваё выданне. Затым, праз год, пра сумесны краязнаўчы напрамак у
рабоце рэдакцыі газеты і раённага музея дапамагала расказваць дырэктар гэтай
установы Валянціна Шуракова. Яшчэ праз год яскрава віталі гасцей «Лоцвінскія
ўдалухі»: Галіна Дрожжа і Валянціна Шыманская. Летась нам дапамагалі
Таццяна Ермаловіч і яе выхаванкі.
Мінае час. І кожны год мы
імкнёмся прыдумаць нешта цікавае і новае, каб наведвальнікі выставы не
засталіся абыякавымі, каб да выдання Капыльскага раёна праяўлялі асаблівую зацікаўленасць.
Так адбылося і ў гэтым годзе. Каб пераканацца ў справядлівасці сказаных слоў,
давайце разам наведаем выставачны цэнтр.
Спецыяліст «СБ. Беларусь
сегодня» Марыя Кузьмянкова дала высокую ацэнку газеце «Слава працы»
Ля самага ўваходу як сімвалы
плённага міжнароднага супрацоўніцтва — 20 сцягоў тых краін, адкуль у Беларусь
прыехала звыш трохсот прадстаўнікоў. У прасторнай зале выставачнага цэнтра сабраліся
супрацоўнікі шматлікіх выдавецтваў і рэдакцый. Яны імкнуцца прадэманстраваць
гісторыю і шляхі сучаснага развіцця СМІ ў Беларусі. Усе, хто завітаў у сталічны
комплекс «БелЭкспа», убачылі, што ён часова нібы ператварыўся ў вялікі
карэспандэнцкі пункт: адсюль на ўсю рэспубліку (ды нават і за яе межы)
разлятаюцца паведамленні, відэа- і фотаінфармацыя.
Вось стэнды сродкаў масавай
інфармацыі ўсіх рэгіёнаў нашай краіны. Абмінуць стэнд «СМІ Мінскай вобласці»
проста немагчыма: гукамі беларускіх народных музычных інструментаў запрашаюць
калегі з «Маладзечанскай газеты». Рыхтуюцца да выступлення спявачкі з
Капыльшчыны: настаўніца музыкі СШ № 2 г. Капыля Таццяна Ермаловіч і яе
выхаванкі — удзельніцы студыі эстраднага вакалу «Клио» пры Цэнтры творчасці
дзяцей і моладзі Капыльскага раёна Ганна Засімовіч і Ірына Драцкая.
— Як цудоўна спяваюць капылянкі!
— адзначае галоўны рэдактар «Мала- дзечанскай газеты» Аляксандр Іванавіч
Лазоўскі.
Згадзіліся з ім і розныя
наведвальнікі выставы, якіх, дарэчы, каля нашага стэнда сабралася нямала: і
жанчыны паважанага ўзросту, і курсанты ваеннага вучылішча, і прадстаўнікі іншых
друкаваных выданняў.
На памяць аб знаёмстве з раённай
газетай «Слава працы» гледачы атрымалі друкаваныя сувеніры: календары,
блакноты, рэкламныя праспекты.
— Проста цудоўна! І спевы
прыгожыя паслухала, і блакнот з фотаздымкам Калядных цароў з Семежава атрымала!
— дзялілася ўражаннямі адна з наведвальніц.
— А ў мяне — блакнот з
маляўнічымі краявідамі Капыльшчыны! — радуецца другая жанчына.
Вядучыя — Дзіяна Ткачэнка і
Сяргей Козел
Прыемна, калі твая работа
прыносіць задавальненне і радасць розным людзям. Калі слова, напісанае
журналістам, знаходзіць водгук у сэрцы чытачоў. Не памылюся, калі адзначу, што
некаторыя наведвальнікі прыходзяць на выставу менавіта для таго, каб паглядзець
нашу прэзентацыю, каб пацікавіцца, чым і як жыве Капыльшчына. Пацвярджэнне — у
словах Людмілы Людвігаўны Драздовай (Васюк), жыхаркі г. Мінска, ураджэнкі
нашага раёна:
Ганна Засімовіч, Ірына Драцкая і
Таццяна Ермаловіч
— Так, я родам з Капыльшчыны.
Прыходжу на выставу ўжо не першы год. Памятаю, як два гады таму выступалі
«Лоцвінскія ўдалухі». Яны тады нас смачна частавалі! А леташняе выступленне
запомнілася цудоўным выкананнем песень дзяўчаткамі. І ў гэтым годзе спецыяльна
прыйшла, каб пабачыць выступленне капылян. З цікавасцю прагартала і газету: як
справы ў сельскай гаспадарцы, што новага адбываецца ў культурным жыцці раёна.
На памяць узяла некалькі экзэмпляраў. Дарэчы, працавала я інжынерам на ААТ
«Інтэграл». А мая маці, Дашкевіч Рэгіна Іванаўна, нарадзілася ў 1928 годзе ў
вёсцы Леанова, што ў Пацейкаўскім сельсавеце. Дзяцінства ў яе было вельмі
цяжкім: бацьку рэпрэсіравалі, затым настала вайна. Пасля яе заканчэння брат
завёз маму ў Баранавічы, дзе яна паступіла ў медыцынскае вучылішча. Працаваць
накіравалі на Гродзен- шчыну. Там у хуткім часе яна выйшла замуж, нарадзіла
пяцёра дзетак. Яе медыцынскі стаж 57 гадоў. Яна памерла два гады таму. Раней я
наведвалася ў Кацельнікі, куды ездзіла да цёткі. Мае сваякі і зараз жывуць у
Капылі.
А ў
гэты час
На галоўнай сцэне тэлежурналісты
з вядучых каналаў расказвалі пра тое, як ствараюцца тэлеперадачы, запрашалі
гледачоў прыняць удзел у інтэрактыўнай віктарыне. Прывабных удзельніц конкурсу
«Міс Беларусі» прадставілі супрацоўнікі тэлеканала АНТ. Кожная з прыгажунь
змагла расказаць пра сябе, пра свет сваіх захапленняў.
Чытачы задаволены: яны атрымалі
прадукцыю «СП»
Не пагутарыць з іншымі
ўдзельнікамі выставы мы, канешне ж, не маглі. Таму прадаставім ім слова:
— Мяне завуць Марыя Кузьмянкова.
Працую спецыялістам па маркетынгу аддзела развіцця ў рэдакцыі газеты «Советская
Белоруссия». Сёння мы з задавальненнем прэзентуем усе выданні нашага холдынгу.
Тут вельмі цікава, дадзена добрая магчымасць не толькі заявіць пра сябе, але і
падзяліцца вопытам з калегамі.
— Мяне завуць Юі. Я з Кітая.
Вучуся ў Беларусі ўжо на працягу 7 гадоў. Сёння ад пасольства Кітайскай
Народнай Рэспублікі ў Рэспубліцы Беларусь мы прадстаўляем кнігі, часопісы,
дыскі пра нашу краіну. Бачыце, уся прадукцыя яркая, сучасная. У Беларусі мне
падабаецца.
Дзіяна
ТКАЧЭНКА
Фота
аўтара
«СП» http://www.kopyl.by