У
практыку работы мясцовай улады раёна ўводзіцца правядзенне выязных пасяджэнняў
райвыканкама. Падчас іх прыярытэтная ўвага надаецца пытанням
добраўпарадкавання. Першае такое пасяджэнне адбылося на тэрыторыі Семежаўскага
сельсавета.
Ля музейнай экспазіцыі Міхаіла
Высоцкага
Ужо па дарозе да пункта
прызначэння члены выканкама на чале са старшынёй райвыканкама Анатолем
Ліневічам разам з начальнікамі аддзелаў, прадпрыемстваў і службаў раёна
аналізавалі ход навядзення парадку на тэрыторыі Капыльскага, Цімкавіцкага і
Блеўчыцкага сельсаветаў, праз якія прайшоў маршрут.
У поле зроку ў Семежаўскім
сельсавеце трапілі разнастайныя аб’екты. Найперш была наведана музейная
экспазіцыя, прысвечаная Герою Беларусі, доктару тэхнічных навук, акадэміку
Міхаілу Высоцкаму, дзе з жыццёвым і працоўным шляхам знакамітага земляка
пазнаёміла дырэктар раённага краязнаўчага музея Валянціна Шуракова. Добрыя
ўражанні ва ўдзельнікаў пасяджэння засталіся падчас наведвання жывёлагадоўчых
ферм, мехмайстэрняў ААТ «Семежава». Старшыня сельвыканкама Марыя Стружко і старшыня
сельгаспрадпрыемства Анатоль Жданеня расказалі пра сумесную работу па захаванні
старых, закінутых пабудоў і ўвогуле пра вырашэнне пытанняў добраўпарадкавання.
Прыемныя ўражанні пакінуў сквер у цэнтры аграгарадка: прыгожыя альтанкі і
дагледжаныя клумбы прывабліваюць наведвальнікаў. Клапоцяцца аб навядзенні
парадку і ў ДУА «Семежаўскі ВПК дзіцячы сад-сярэдняя школа». Тут размешчаны
стадыён, гімнастычны комплекс, дзіцячыя гульнёвыя пляцоўкі. Таксама госці
пабывалі ў абсталяваных школьных кабінетах, гульнёвых і спальных пакоях для
дашкольнікаў, даведаліся, як праходзіць у навучальнай установе шосты школьны
дзень. З умовамі, створанымі для прыёму і лячэння хворых, можна было
пазнаёміцца падчас наведвання ўчастковай бальніцы. У цэнтры Семежава наведалі
гандлёвыя кропкі: райспажыўтаварыства, індывідуальнага прадпрымальніка і
магазін «Белыя Росы» мясцовага сельгаспрадпрыемства. Дарэчы, апошні асабліва
вызначаецца сваім багатым асартыментам. Адпачыць з задавальненнем жыхары
аграгарадка могуць у Цэнтры культуры і вольнага часу. Тут жа працуюць выставы
вырабаў ткацтва, касцюмаў удзельнікаў каляднага абраду «Цары», семежаўскіх
кулінарных традыцый і многія іншыя.
Гульнёвая пляцоўка ў Семежаўскім
ВПК
Даволі сур’ёзная размова
адбылася падчас выніковай нарады паміж кіраўніком раёна Анатолем Ліневічам і
прадстаўнікамі зацікаўленых структур. Анатоль Канстанцінавіч выказаў заўвагі
наконт нізкага ўзроўню догляду за аб’ектамі раёна электрычных сетак, у
прыватнасці, за трансфарматарнымі падстанцыямі, яны не ўсюды абкошаны. Выклікае
занепакоенасць стан прыдарожных палос, якія ў большасці сваёй зараслі ці
абкошаны не так, як трэба. Тут былі закрануты дарожныя арганізацыі, якія
абслугоўваюць раён. Шмат пытанняў было зададзена ў адрас жыллёва-камунальнай
гаспадаркі. Указана на адсутнасць належнага кантролю з боку прыродаахоўнай
службы. Анатоль Ліневіч выказаў прапанову раённаму Савету дэпутатаў
арганізаваць выезд старшынь сельсаветаў у іншыя раёны ці вобласці рэспублікі з
мэтай вучобы па пытаннях добраўпарадкавання, а падобныя выязныя нарады на
Капыльшчыне праводзіць кожны месяц з ацэнкай работы старшынь сельвыканкамаў і
кіраўнікоў сельгаспрадпрыемстваў. Дарэчы, наступны плануецца правесці на базе
Пацейкаўскага сельсавета.
У магазіне райспажыўтаварыства
Шэраг пытанняў акрэсліла і
старшыня раённага Савета дэпутатаў Ірына Кісляк. Ірына Мікалаеўна адзначыла,
што парадак трэба падтрымліваць пастаянна. Усе структуры павінны працаваць на
агульны вынік — гэта сумесная работа сельсавета, сельгас-прадпрыемства,
жыллёва-камунальнай гаспадаркі, дарожнікаў, энергетыкаў. Часам бывае, што на гэтыя
мэты не патрабуюцца даволі глабальныя затраты, а проста неабходна правільна
арганізаваць працэс.
Сяргей
КОЗЕЛ
Фота
аўтара
«СП» http://www.kopyl.by
