Юныя
творцы з нашага раёна ўзнагароджаны дыпломамі і каштоўнымі падарункамі па
выніках ІІІ абласнога свята-конкурсу дзіцячай творчасці «Калыска талентаў».
Юныя майстры са сваімі
настаўнікамі
У нашай краіне шмат робіцца для
таго, каб развіваць творчасць і талент хлопчыкаў і дзяўчынак, праходзіць
мноства дзіцячых фестываляў і конкурсаў, якія заваявалі папулярнасць у
падрастаючага пакалення. Адным з такіх у Мінскай вобласці з’яўляецца абласное
свята-конкурс дзіцячай творчасці «Калыска талентаў», якое традыцыйна праходзіць
на клецкай зямлі. Дарэчы, упершыню названае свята было праведзена ў рамках
абласной праграмы «Традыцыйная культура і дзеці». А «дзіцячым» яно называецца
таму, што да ўдзелу ў ім запрашаюцца тыя, хто яшчэ не адзначыў 18-годдзе. Да
таго ж рабяты з’яўляюцца навучэнцамі дзіцячых школ мастацтваў, студый і
гурткоў, а таксама ўдзельнікамі фальклорных калектываў і калектываў
дэкаратыўна-прыкладнога мастацтва клубных і пазашкольных устаноў.
На працягу свята хлопчыкі і
дзяўчынкі вызначыліся талентам, размаўлялі, кіраўнікі калектываў перадавалі
набыты вопыт калегам, вучыліся адзін у аднаго. Магчымасць паказаць сваю творчую
«разыначку» была ва ўсіх удзельнікаў конкурсу. З задавальненнем і ўпэўненасцю
юныя жыхары Капыльшчыны дэманстравалі свае творчыя магчымасці і дасягненні.
Журы, якое ўзначаліла кандыдат педагагічных навук, дацэнт, член праўлення
грамадскага аб’яднання «Беларускі саюз майстроў народнай творчасці» Любоў
Еўдакімаўна Раманенка, вызначала лепшых у кожнай намінацыі. Так, Раман Волкаў
атрымаў Дыплом І ступені за захаванне і развіццё традыцыйнай спадчыны свайго
раёна, лепшую калекцыю хатніх работ, выкананую ў тэхніцы «бісерапляценне».
Дыпломамі ІІ ступені за ўклад у развіццё традыцыйнай спадчыны і творчы падыход
у выкананні твораў: з цеста — узнагароджана Ангеліна Голец, беларускага
пояса — Данііл Сафронаў і Кацярына Бубніковіч. Дыплом ІІ ступені атрымаў
Аляксей Бірук і Дыплом ІІІ ступені Мікалай Шчоткін за ўклад у развіццё
традыцыйнай спадчыны і творчы падыход у выкананні твораў мастацкага ткацтва. За
выкананне твораў мастацкай керамікі Дыпломам ІІ ступені ўзнагароджана Ксенія
Скамароха. Усе названыя хлопчыкі і дзяўчынкі — выхаванцы раённага цэнтра
ткацтва, узначальвае які Таццяна Волкава.
Дыплом І ступені за лепшую
калекцыю хатніх работ, выкананую з мастацка апрацаванай скуры, атрымала
выхаванка Капыльскай дзіцячай школы мастацтваў Дар’я Драко (настаўніца Мілана
Мароз).
Дар’я Драко і Мілана Мароз
Дыпломамі за актыўны ўдзел у
фестывалі ўзнагароджаны навучэнцы Цімкавіцкай дзіцячай школы мастацтваў Яна
Лазук, Ангеліна Пяцігорац, Станіслаў Траяновіч (настаўніца Алена Бельская) і
выхаванкі Цэнтра творчасці дзяцей і моладзі Капыльскага раёна Дар’я Ра-дзечка і
Настасся Таткова (настаўніца Марыя Муратава). Яны прадэманстравалі свае ўменні
ў тым, як плесці беларускія паясы і ляпіць цудоўныя керамічныя рэчы адпаведна.
Асабліва прыемна, што аб тым, як
цудоўна і яскрава было прадстаўлена мастацтва Капыльшчыны, напісалі на
старонках клецкай раённай газеты «Да новых перамог»: «Прыцягнулі ўвагу майстры
з Капыльшчыны. Тут, пад скронямі дрэў, разгарнуўся цэлы ткацкі комплекс! Ужо
пры падвядзенні вынікаў высветлілася, што 16 рабят былі адзначаны дыпломамі, і
восем з іх — не толькі за актыўны ўдзел… Што тут яшчэ можна дадаць: таленавітыя
дзеткі!»
Дзіяна
ТКАЧЭНКА
«СП» http://www.kopyl.by