Добра
вядомая ў раёне сям’я педагогаў Анатоля Мікалаевіча і Галіны Уладзіміраўны
Сікорскіх (на здымку) з Капыля праявіла сваю актыўную жыццёвую пазіцыю і
прыйшла на Коласаўскі ўчастак для галасавання № 15 у першы дзень датэрміновага
галасавання.
— Па сямейных абставінах на
выхадныя мы не будзем у Капылі, паедзем у Мінск да сваіх дочак, — тлумачыць
паважаная сямейная пара. — Таму вырашылі скарыстацца магчымасцю, прадугледжанай
выбарчым заканадаўствам, і аддалі свае галасы раней. Тым больш, што на сямейным
савеце мы ўжо даўно вызначыліся, каго выбіраць. Хацелася б, каб той дэпутат,
які будзе прадстаўляць наш рэгіён у парламенце, унёс важкі ўклад у развіццё і
працвітанне Капыльскага раёна.
А вось уклад Сікорскіх у
развіццё сістэмы адукацыі Капыльшчыны даволі багаты. Напрыклад, Анатоль Мікалаевіч
больш чым за 40 гадоў сваёй працы на педагагічнай ніве ў СШ № 2 г. Капыля
падрыхтаваў 6 лаўрэатаў спецыяльнага фонду Прэзідэнта Рэспублікі Беларусь,
займаўся даследчай дзейнасцю па вывучэнні роднага краю, выданнем дапаможнікаў
для настаўнікаў і вучняў па геаграфіі Беларусі. Апублікавана звыш 80 яго
метадычных артыкулаў, шмат гадоў працаваў пазаштатным лектарам Інстытута
павышэння кваліфікацыі пры Акадэміі паслядыпломнай адукацыі, напісаў гісторыю
СШ № 2 г. Капыля. Яго жонка Галіна Уладзіміраўна падчас працы
настаўніцай пачатковых класаў гімназіі № 1 г. Капыля дала пуцёўку ў жыццё
таксама вялікай колькасці вядомых людзей.
Сяргей
КОЗЕЛ
Фота
Сяргея ЛАЗОЎСКАГА
«СП» http://www.kopyl.by
