Традыцыйнае
свята Івана Купалы ў ноч з 6 на 7 ліпеня адзначылі ў Капылі.
Шматлікіх гасцей свята ў зоне
адпачынку горада віталі самадзейныя артысты раённага Цэнтра традыцыйнай
культуры, удзельнікі мастацкай самадзейнасці Цімкавіцкага СДК і Капыльскага
дзяржаўнага каледжа. У тэатралізаваным дзействе з удзелам Нептуна (Вячаслаў
Курчык), Лесуна (Улад Баран), Кікімары (Наталля Раеўская) і іншых фальклорных
герояў яны весялілі гледачоў сваімі забаўляльнымі конкурсамі і
выступленнямі. Добрым дадаткам сталі песні ў выкананні артыстаў Навасёлкаўскага
СДК, народнага калектыву народнай песні «Спадчына», Руднянскага
клуба-бібліятэкі, а таксама кампазіцыя харэаграфічнага калектыву РЦК (кіраўнік
— Вераніка Гурло).
Займальным і вясёлым быў і працяг
свята ля вялікага вогнішча. Каб усе мінулыя няшчасці і адмоўныя падзеі сышлі ў
нябыт, па добрай традыцыі на Купалу спалілі ляльку Мару. Каля святочнага
вогнішча разыгрывалася чарговае прадстаўленне, дзе злыя сілы (нечысць)
змагаліся з дабром. І, як заўсёды, дабро перамагло!
Асаблівую радасць і азарт
выклікалі народныя гульні. Арганізатары мерапрыемства зрабілі ўсё, каб
падараваць добры настрой, радасць, весялосць, бадзёрасць, а галоўнае —
пазнаёмілі прысутных з фальклорнымі традыцыямі. Пад гукі музыкі шматлікія госці
(дарэчы, іх сабралася больш за палову тысячы чалавек) разам з фальклорнымі
героямі і дзяўчатамі ў вянках, сплеценых з лугавых кветак, вадзілі карагоды,
скакалі праз агонь. З задавальненнем маладыя людзі прымалі ўдзел у конкурсах на
лепшую Купалінку, кіданні вянкоў на дрэва і праз касцёр.
Кульмінацыяй свята стаў пошук
цудадзейнай папараць-кветкі, якую змаглі знайсці толькі за поўнач. Акрамя
вышэйадзначаных момантаў свята, капыляне і госці горада маглі паспрабаваць свае
сілы ў іншых атракцыёнах, якія прадставілі Капыльскі РКБА і індывідуальныя
прадпрымальнікі, а таксама падсілкавацца духмянымі шашлыкамі, выпечкай і іншымі
прысмакамі ад Капыльскага райспажыўтаварыства. А напрыканцы мерапрыемства для
прысутных адбылася дыскатэка.
Нягледзячы на даволі халаднаватае
надвор’е, ўдзельнікі свята весела правялі час і пакідалі зону адпачынку ў
выдатным настроі.
Сяргей
ЛАЗОЎСКІ
Фота
аўтара
«СП» http://www.kopyl.by
