Чарговае
свята вёскі адбылося на тэрыторыі Цімкавіцкага сельсавета.
Трэцяе па
ліку ў гэтым годзе. На гэты раз святкавалі руднянцы. Пакарміўшы дамашнюю
жыўнасць, жыхары вёскі Руднае, падаставаўшы з куфраў свае кашміроўкі і
новыя спадніцы, хуценька
спяшаліся да
мясцовага сельскага клуба. Там ужоваўсю іграла музыка, працавалі атракцыёны,
ладзілася выстава народных умельцаў. Надвор’е спрыяла святу і
святочнаму настрою вяскоўцаў, хаця ўсе дні ішлі дажджы. Людзей
сабралася шмат: і моладзь, і старыя, і
малыя — усе прыйшлі павесяліцца.
Са словамі
віншавання выступіла старшыня Цімкавіцкага сельвыканкама Алена Острыкава. Яна
пажадала працвітання вёсцы, а яе жыхарам моцнага здароўя, дастатку ў доме,
прыбытку ў гаспадарцы.
Вядучыя
пазнаёмілі прысутных з гісторыяй вёскі Руднае. Напрыклад, назва вёскі Руднае
ўтварылася ад слова «рудый» — людзі даўней казалі, што тут была балоцістая
мясцовасць і зямля была рудая, жалезістая, адсюль пайшла і назва — Руднае. І
першы ўспамін пра вёску ў летапісе датуецца аж 1638 годам. Вёска ўваходзіла ў
склад фальварка Скіп’ёва, ад якога, на жаль, засталіся толькі могілкі. З 1795
г. перайшла ў Слуцкі павет Мінскай губерніі. З 1800 г. вёска з’яўлялася ўласнасцю
князя Радзівіла, у ёй мелася карчма. З 1897 г. — у складзе Цімкавіцкай воласці
Слуцкага павета. У 1912-м адкрыта аднакласнае народнае вучылішча, а з 1920-га —
працоўная школа 1-й ступені (два настаўнікі і 53 вучні). У весцы быў млын. А
вось ужо з 20 жніўня 1924 г. веска адышла пад Вялікараёўскі сельсавет
Капыльскага раёна Слуцкай акругі. З 1 ліпеня 2013 г. вёска Руднае знаходзіцца ў
складзе Цімкавіцкага сельсавета.
Затым
ушанавалі старэйшага жыхара вёскі. Ім аказалася Марыя Васільеўна Смірнова, якой
у гэтым годзе спаўняецца 89 гадоў. А вось самы малодшы жыхар — Насця, якая
нарадзілася 23 сакавіка бягучага года ў
Білана Сяргеевіча і Надзеі Аляксандраўны Васільковых. Дарэчы,
гэта трэцяе па ліку дзіцятка ў дадзенай сям’і. Ушанавана была
і мнагадзетная сям’я Рамана Міхайлавіча і Надзеі Пятроўны
Сельвановічаў. Яны гадуюць пяцярых дзетак: двух хлапчукоў і трох дачушак.
Пад гучныя
апладысменты прысутных на сцэну былі запрошаны пераможцы конкурсу на лепшы
падворак. Усяго было адзначана чатыры сям’і: Аляксанд-ра Віктаравіча і Святланы
Адамаўны Ясючэняў, Анатоля Станіслававіча і Валянціны Альфрэдаўны
Салаўёў, Ганны Баляславаўны і Валерыя Антонавіча Цвілевічаў, Віталя
Казіміравіча і Алены Валянцінаўны Паграбіцкіх.
Багатым на
падзеі стаў гэты год для сям’і Дзічкоўскіх — Святланы Леанідаўны і Віктара
Станіслававіча: яны адзначылі сярэбранае вяселле. А яшчэ Святлана Леанідаўна
святкавала свой 45-гадовы юбілей, ды ў пачатку ліпеня яны справілі
вяселле свайго сына Віталя, якому споўнілася 25 гадоў.
Адзначаны
былі таксама і мясцовыя жыхары, якія прынялі ўдзел у выставе народных умельцаў.
Прыгожыя вышыўкі прапанавала Яўгенія Мікалаеўна Шыбут, а разьбу па дрэву —
Уладзімір Дзмітрыевіч Гарбуз.
Усе
намінанты былі адзначаны падарункамі і сувенірамі. А ўдзельнікі мастацкай
самадзейнасці Навасёлкаўскага, Цімкавіцкага сельскіх дамоў культуры і
Руднянскага сельскага клуба дарылі прысутным свае прыгожыя песні. Не абышлося і
без конкурсаў. Адзін з іх — гэта конкурс талентаў. Пад гукі баяна свае песні
спявала Святлана Петрусевіч, а вершы і байкі чытала Марыя Гарбуз. Была
праведзена таксама латарэя, у якой прайграўшых не было.
Свята
завяршылася, але доўга яшчэ над Рудным гучала вясёлая музыка, якая перайшла ў
танцавальны вечар. Гэты дзень надоўга запомніца жыхарам вёскі Руднае, і ў іх
ёсць над чым працаваць па добраўладкаванні і нявядзенні парадку на сваіх
сядзібах, каб у наступным годзе свята сустрэць больш годна.
Наш кар.
«СП» www.kopyl.by
