Увагу
ўсіх, хто накіроўваўся ў гэты святочны дзень у зону адпачынку, прыцягваў
сапраўдны дзіцячы гарадок, які размясціўся абапал дарогі на Капыль. Як мы ўжо
расказвалі, там было безліч атракцыёнаў, надзіманых горак, каруселяў і іншых
забаў для малых. Трэба адзначыць, што амаль усе яны былі ўстаноўлены спецыяльна
для правядзення святочных мерапрыемстваў.
Тым не менш і сёння дзіцячая
пляцоўка выглядае досыць прывабна. Акуратныя дарожкі, лавачкі, дзе мамы і таты,
дзядулі і бабулі могуць пася-дзець, пакуль іх дзеці катаюцца з горкі, спрабуюць
свае сілы на турніку, залазяць у казачны домік з бярвенняў. А праз нейкі час,
паводле слоў начальніка аддзела ЖКГ Капыльскага райвыканкама Марыны Канончык,
атракцыёнаў стане значна больш.
А падарылі гэту радасць маленькім
капылянам прадстаўнікі многіх арганізацый — Капыльскага вопытнага лясгаса,
Капыльскай ЖКГ, Капыльскага РБУ, Капыльскага райаграсэрвісу. Урачыстае адкрыццё
аб’екта адбылося 26 жніўня ў прысутнасці старшыні райвыканкама Анатоля
Ліневіча, дэпутата Палаты прадстаўнікоў Нацыянальнага сходу Рэспублікі Беларусь
Людмілы Ніжэвіч, іншых ганаровых гасцей, якія завіталі ў гэты дзень у Капыль на
свята.
Несумненна, стане любімым
месцам адпачынку для гараджан і сквер, які з’явіўся на скрыжаванні вуліц
Трактарнай і Цімкавіцкай. Раней тут раслі старыя дрэвы, пасвіліся козы, а зараз
радуюць вока дэкаратыўныя ліхтары, якія сталі вынікам актыўнага ўдзелу многіх
арганізацый і прадпрыемстваў раёна ў аб’яўленым райвыканкамам конкурсе.
Кветкавыя кампазіцыі ўтвараюць
арыгінальныя клумбы, ёсць нават невялікі басейн. Для таго, каб гэта месца
набыло прывабны выгляд, давялося вельмі шмат папрацаваць многім. У першую
чаргу, гэта работнікі раёна газазабеспячэння, была
задзейнічана тэхніка і працоўныя сілы ПМК-11, Капыльскага РБУ і інш. Вялікую
дапамогу аказалі кіраўнік фермерскай гаспадаркі Міладзін Лучыч, СТАА
«Капыльская вытворчасць будаўнічых сістэм». Шмат суботнікаў правялі
супрацоўнікі райвыканкама.
Адкрыццё новага сучаснага рынку
таксама стала адным з пунктаў святочнай праграмы. Гэта дазволіць упарадкаваць
гандаль прадукцыяй, вырашчанай на сялянскіх падвор’ях, сканцэнтраваць у адным
месцы гандлёвыя павільёны прыватных прадпрымальнікаў, дабавіць зручнасці і
парадку як прадаўцам, так і пакупнікам. Невялічкія магазінчыкі са светлымі
вокнамі на некалькі ўваходаў, два з якіх яшчэ не дабудаваны, крытыя гандлёвыя
рады — усё гэта пакуль яшчэ бязлюднае. Але спадзяёмся, што ў хуткім часе аб’ект
не фармальна, а на самой справе пачне сваю работу.
Маргарыта
САКОВІЧ
Фота
аўтара і Сяргея ЛАЗОЎСКАГА
«СП» http://www.kopyl.by
