Майстры
з Капыльшчыны — удзельнікі народнага клуба рамёстваў «Скарбонка» — прэзентавалі
свае таленты і ўменні на III абласным свяце народных мастацкіх рамёстваў
«Слуцкія паясы», у якім сваё майстэрства дэманстравалі больш за 500 народных
умельцаў з розных рэгіёнаў Беларусі.
Адкрываючы мерапрыемства,
начальнік галоўнага ўпраўлення ідэалагічнай работы, культуры і па справах моладзі
Мінаблвыканкама Сяргей Ладышаў падкрэсліў, што свята «Слуцкія паясы» — маладое,
адзначаецца трэці раз, але ўжо мае шмат прыхільнікаў. Яго ўдзельнікі — выдатныя
майстры народнай творчасці, якіх можна назваць «майстры залатыя рукі». Свята
невыпадкова праводзіцца на Случчыне, у краі, дзе быў створаны славуты слуцкі
пояс — брэнд нацыянальнай культуры.
Адной з
адметнасцяў і новаўвядзеннем свята было дэфіле нацыянальных
касцюмаў «Погляд у мінулае», якое адбывалася на працягу больш за дзве гадзіны
на цэнтральнай плошчы горада. Традыцыйныя касцюмы семежаўскага строю —
мужчынскі святочны і два жаночыя — былі адроджаны дырэктарам раённага Цэнтра
традыцыйнай культуры Галінай Гурло і дырэктарам раённага Цэнтра ткацтва
Таццянай Волкавай. Адрэстаўрыраваць касцюмы дапамагла народны майстар Беларусі
Валянціна Міхайлаўна Кіеня. А дэманстравалі адзенне навучэнцы Капыльскага
дзяржаўнага каледжа Яўген Жаўрыд, Анжаліка Ясючэня і Кацярына Кудзялько. Трэба
адзначыць, што адзін з жаночых касцюмаў быў поўнасцю выкананы ўручную:
пачынаючы з вырабу самой тканіны і заканчваючы шыццём спадніцы, сарочкі і
фартуха. Па выніках дэфіле Дыпломы за прэзентацыю калекцыі сучаснага
дызайнерскага адзення па традыцыйных матывах «Этна-стыль» атрымалі дырэктар
раённага Цэнтра традыцыйнай культуры Галіна Гурло і дырэктар раённага Цэнтра
ткацтва Таццяна Волкава. Майстры народнага клуба «Скарбонка» былі ўзнагароджаны
Дыпломам за прэзентацыю рэгіянальных відаў рамёстваў.
Трэба адзначыць і яшчэ адну
адметнасць сёлетняга свята: месцы размяшчэння народных умельцаў на цэнтральнай
плошчы былі абазначаны арыгінальнымі прыгожымі «домікамі» з выявамі старажытных
слуцкіх паясоў. Атрымалася, як кажуць, своеасаблівая рамесніцкая слабада.
«Заварожвалі сваёй прыгажосцю
капыльскія і старадарожскія ручнікі, лагойская і івянецкая кераміка, клецкая і
маладзечанская лаза, вілейская і мядзельская разьба па дрэве», — пісалі пра
свята карэспандэнты газеты «Слуцкі край».
Дзіяна
ТКАЧЭНКА
«СП» http://www.kopyl.by
