У
падраздзяленнях Міністэрства па
надзвычайных сітуацыях служаць сапраўдныя мужчыны. Людзі, слабыя ў фізічным і
псіхалагічным плане, там доўга
не затрымліваюцца.
Для выканання сваіх абавязкаў
пажарны-выратавальнік павінен валодаць многімі прафесійна важнымі якасцямі —
самаадданасцю, мужнасцю і адвагай. Але самае галоўнае, ён павінен умець хутка
прымаць рашэнні, не раздумваючы кінуцца на дапамогу людзям, якія апынуліся ў
бядзе. Менавіта такія важныя якасці ўласцівы майстрам выратавальнай справы
Капыльскага РАНС.
Згодна з загадам міністра па
надзвычайных сітуацыях ад 26 снежня 2017 года восем супрацоўнікаў аддзела
заахвочаны за мужнасць і гераізм, праяўленыя пры ўзорным выкананні службовага
абавязку. У іх ліку — начальнік каравула Аляксандр Чаркас, камандзіры
аддзяленняў Сяргей Дуля, Аляксандр Рымашэўскі, Дзмітрый Буцько з пажарнай
аварыйна-выратавальнай часці № 1, начальнік каравула Дзяніс Нікалайчык,
камандзір аддзялення Дзяніс Булынка, вадзіцель Аляксандр Дзічкоўскі з пажарнай
аварыйна-выратавальнай часці № 2 і камандзір аддзялення пажарнага
аварыйна-выратавальнага паста № 15 Павел Дашкевіч.
Як вядома, работа ў складаных
умовах з павышанай небяспекай патрабуе ад выратавальнікаў валодання
рознабаковымі якасцямі і навыкамі. Якімі? Аб гэтым разважае Аляксандр Чаркас,
прызванне і лёс якога на працягу ўжо амаль 20 гадоў звязаны са справай
выратавання:
— Работа выратавальнікаў-пажар-ных
патрабуе вынослівасці, кемлівасці, хуткай рэакцыі і практычна поўнай адсутнасці
страху ў моманты ліквідацыі надзвычайнай сітуацыі, барацьбы з вогненным
ворагам. Аднак гэтага недастаткова: выратавальнікамі ідуць працаваць людзі з
добрым і смелым сэрцам, неабыякавыя да бяды і болю іншых. Гэта велікадушныя
людзі, бо, не задумваючыся, яны гатовы ахвяраваць сабой дзеля іншых, прычым
бескарысліва. Выратавальнік — гэта не работа, а стан душы, прызванне, лёс. І
вельмі цудоўна, калі побач з табой працуюць сапраўдныя прафесіяналы.
На памяці ў Аляксандра адзін з пажараў,
які адбыўся месяцы два таму. Той выпадак да дробязей бу-дзе памятацца доўга.
Здарэнне не выходзіла з разраду звычайных. У цэнтр аператыўнага кіравання
паступіла паведамленне аб пажары ў в. Душава. Задача выратавальнікаў
абмяжоўвалася хуткай лакалізацыяй і наступнай ліквідацыяй агню. На месца
падраздзяленне прыбыло праз некалькі хвілін. Хуценька разгарнулі «рукавы» і
прыступілі да тушэння. Яшчэ па дарозе ў населены пункт даведаліся, што ў доме
знаходзіцца чалавек. Таму тэрмінова кінуліся ў дом. З-за моцнага задымлення і
высокай тэмпературы давялося апусціцца на калені і паўзці па падлозе. У першым
пакоі чалавека не было… Знайшлі яго ў другім. Зразумець, ці ёсць прыкметы
жыцця, было вельмі складана. Аператыўна эвакуіравалі на свежае паветра. Стала
бачна, што пацярпелы жывы. Якраз падаспела хуткая дапамога, якая і даставіла
ахвяру полымя ў бальніцу. Чалавек быў выратаваны.
Як лічыць Аляксандр Чаркас, гэта
толькі кажуць, што той, хто ледзь не штодня сутыкаецца з небяспекай, прывыкае
да яе. Да яе нельга прывыкнуць, як нельга заставацца абыякавым да чужой
бяды.
Асабліва страшна, калі на пажары
ці ў іншай надзвычайнай сітуацыі гінуць людзі. І вельмі балюча становіцца ад
таго, што не заўсёды можна ім дапамагчы.
На памяці ў Дзяніса Нікалайчыка і
яго калег дарожна-транспартнае здарэнне каля в. Філіпавічы. Падчас яго загінула
дзяўчынка. А спецыялісты пажарнай аварыйна-выратавальнай часці з Цімкавічаў
змаглі выратаваць яе дзядулю, які знаходзіўся ў пабітым аўтамабілі.
— Вядома, што трагедыі вельмі
ўражваюць. А ці бываюць выпадкі, калі адчуваеце асаблівае задавальненне ад
работы? — пытаемся ў Дзяніса.
— Такое адчуванне ёсць заўсёды,
калі ўдаецца пазбегнуць ахвяр, своечасова людзям дапамагчы, тады з табой
адбываецца нешта незвычайнае, быццам адкрываецца другое дыханне, — пачулі ў
адказ.
Сяргей
КОЗЕЛ
Фота Паўла
ШЭІНА
Паважаныя супрацоўнікі і ветэраны
аддзела па
надзвычайных сітуацыях!
Ваша служба з’яўляецца
адной з важнейшых. Кругласутачна вы знаходзіцеся на варце бяспекі жыхароў
Капыльшчыны, вытворчых і сацыяльных аб’ектаў раёна, а ў экстрэмальных сітуацыях
самааддана змагаецеся са стыхіяй. Вельмі часта аказваецеся ў зоне рызыкі,
сутыкаецеся з людскімі трагедыямі і пры гэтым захоўваеце ў сабе здольнасць
суперажываць.
Прыміце самыя цёплыя словы
ўдзячнасці за самаадданую працу, чалавечнасць і гатоўнасць у любы момант
прыйсці на дапамогу. Жадаем моцнага здароўя, шчасця, мужнасці і міласэрнасці,
дабрабыту вам і вашым сем’ям. Няхай жыццёвыя абставіны як мага радзей
выпрабоўваюць вас на трываласць.
Раённы выканаўчы камiтэт
Раённы Савет дэпутатаў
«СП»