Матуль і
татаў, бабуль і дзядуляў — словам, усіх, хто ўваходзіць у сямейнае кола кожнага чалавека, сонечным днём віталі на
раённым фестывалі сямейнай творчасці «У добрым родзе ўсе ў згодзе».
Атмасфера сямейнай цеплыні і
сапраўднай творчасці адчувалася ўжо ў фае РЦК, дзе на выставе былі прадстаўлены
ўзоры творчасці мам, татаў, бабуль і, канешне ж, дзетак.
Вось свае работы прадстаўляе Ганна
Аляксееўна Корбут з унукамі Вікай, Кацяй і Сашам, якія
завіталі на фестываль з Грозава.
— Без сумнення, я — любімая
бабуля, — з усмешкай расказвае жанчына. — На жаль, бацькі Алена і Мікалай не
змаглі прыехаць, бо занятыя, а я ўжо свабаднейшая, на пенсіі. На працягу жыцця
працавала і заўгасам у школе, і дырэктарам клуба, і мастацкім кіраўніком. Зараз
займаюся вязаннем, вышыўкай, раблю народныя беларускія лялькі. Ды і дзеткі самі
вельмі творчыя. сашка ходзіць на гурток да настаўніка Грозаўскага ВПК д/с – СШ
Ігара Дубіны, вучыцца вырэзваць па дрэве, дзяўчынкі дапамагаюць мне выпякаць
розныя прысмакі. А я і зараз прымаю ўдзел у святочных мерапрыемствах, бо
адчуваю сябе маладой.
Макет роднай вёскі, створаны з
кардону, паказвае Алена Ігнатчык з Цімкавічаў.
— Я працую ў Цімкавіцкай дзіцячай
школе мастацтваў, але зараз знаходжуся ў водпуску па доглядзе за
дзіцем і вельмі радая, што нас запрасілі на фестываль, — дзеліцца ўражаннямі
Алена. — Творчасцю займаемся разам з сынам Даніілам, які вучыцца ў Цімкавіцкай
СШ і наведвае Дзіцячую школу мастацтваў. Мы захоплены творчасцю. Плануем
зрабіць хатку з галінак.
Сям’я Волкавых традыцыйна прадстаўляе семежаўскае
ткацтва. Таццяна разам з сынам Раманам — за кроснамі, а побач з імі — бабуля
Святлана Анатольеўна Пупейка, якая з’яўляецца сапраўдным майстрам-кулінарам.
Далей пра свае творчыя захапленні
прадстаўнікі сямей расказвалі ўжо са сцэны.
— Наш фестываль прысвячаецца Году
малой радзімы, — гаворыць вядучая свята супрацоўніца РЦК Любоў Галубовіч. — Усе
мы ганарымся таленавітымі людзьмі Капыльшчыны, але мала задумваемся над тым,
што мастацтва нараджаецца і, галоўнае, зберагаецца, нягледзячы на няўмольны бег
часу, у родзе чалавека.
— Менавіта згода, узаемаразуменне,
павага адзін да аднаго, агульныя інтарэсы і захапленні для ўсіх членаў сям’і
сталі асноўнай падставай для таго, каб запрасіць на наш фестываль усе тыя
сем’і, што прымаюць удзел у свяце, — дадае яе калега Людміла Давідоўская.
Вось сям’я Нечэпурэнкаў з Быстрыцы. У прыгожых
беларускіх народных касцюмах мама Любоў, тата Іван разам з дачушкамі Любай,
Дашай і Лерай расказваюць пра тое, што Бацькаўшчына — гэта і ёсць сям’я, самае
роднае, што мае чалавек.
Тэма захаплення прысядзібным
дызайнам стала галоўнай у выступленні прадстаўнікоў сям’і Хомічз
Бучаціна — мамы Наталлі і яе дачкі Паліны, а таксама Валянціны Музыкі са Скабіна і дачок Ганны, Лізы, Марыі,
якія, да таго ж, займаюцца і стварэннем тапіярыяў і арыгамі.
Пра жыццё ў згодзе ды ладзе
расказала сям’я Лысак са Старыцы. На свята завіталі матуля
Вольга з дзеткамі Яраславам і Марыяй.
Дзверы ў цудоўны свет захапленняў,
дзе кожны мае сваё хобі, расчынілі для прысутных члены вялікай і дружнай сям’і
Міхаіла Міхайлавіча Мароза з Бабоўні: дачка Настасся з мужам
Андрэем і ўнучкі Юлія і Ксенія.
Прыехала на свята і цудоўная
шматдзетная працавітая і творчая сям’я Невядомскіх з Душава: мама Яна і яе дзеці
Аляксандра, Віталь і Іван, а дома засталася яшчэ маленькая Стафанія.
Акружыла сваіх дзетак любоўю і
пяшчотай Алена Новік з вёскі Навасёлкі Цімкавіцкага
сельсавета, якая ў гэты дзень усю сваю мацярынскую любоў выказала ў вершы,
пры-свечаным дзеткам.
З Цімкавічаў завітала на свята
сям’я Гурыновіч: мама Юля і
яе дачушкі Ангеліна і Дзіяна, якія на сваіх сямейных святах заўсёды самі
ладзяць канцэрты.
У сям’і Лагутаў з Семежава выхоўваецца пяцёра дзяцей,
і на ўсіх хапае бацькоўскай любові, дабрыні і пяшчоты. Пра гэта расказала мама
Іна разам з сынам Іванам.
Сям’я Нікалаевіч з Пясочнага можа ганарыцца тым, што за
30-гадовы перыяд сумеснага жыцця яны захавалі ўсё самае каштоўнае. Аляксандр і
Ларыса выгадавалі трох дачок Алёну, Алесю і Ганну.
Вось на сцэну падымаецца сям’я Касцяленяў з Доктаравічаў. Мама Вольга, тата
Міхаіл, дачка Віялета, сын Дзмітрый, што зусім нядаўна прыйшоў са службы ва
Узброеных Сілах Рэспублікі Беларусь, і маленькая Дарына, якая толькі-толькі
адсвяткавала свой трэці дзень нараджэння. Іх аб’ядноўвае шмат сямейных традыцый
і агульных спраў.
Трэба адзначыць, што кожная сям’я
атрымала цудоўныя падарункі. І таму немагчыма не выказаць падзяку ўсім тым, хто
дапамог арганізаваць і правесці фестываль сямейнай творчасці. Гэта аддзел
ідэалагічнай работы, культуры і па справах моладзі райвыканкама, РА РГА «Белая
Русь», РК ГА «БРСМ», раённы камітэт прафсаюза работнікаў аграпрамысловага
комплексу і раённы Цэнтр культуры. А выхаванцы харэаграфічных гурткоў РЦК
(кіраўнік Святлана Папок) радавалі гледачоў прыгожымі танцавальнымі
пастаноўкамі.
Дзіяна
ТКАЧЭНКА