Правядзенне
на Капыльшчыне сустрэч з моладдзю для дэпутата Палаты прадстаўнікоў
Нацыянальнага сходу Рэспублікі Беларусь Людмілы Ніжэвіч ужо стала традыцыйным.
На гэты раз адбыўся дыялог з прадстаўнікамі маладога пакалення, якія працуюць у
ААТ «Піянер-Агра» і Капыльскім дзяржаўным каледжы.
Шчырую размову таксама падтрымалі
старшыня раённага Савета дэпутатаў Ірына Кісляк, начальнік аддзела
арганізацыйна-кадравай работы райвыканкама Ала Кабушка, старшыня Капыльскага
сельвыканкама Вольга Купрыенка і дырэктар Капыльскага дзяржаўнага каледжа
Анатоль Пяткевіч.
Паколькі большасць з прысутных
непасрэдна звязана з сельгасвытворчасцю, то і ўзнятыя праблемы былі адпаведныя.
Адным з вострых пытанняў застаецца жыллёвае. Зразумела, каб замацаваць
спецыяліста на вёсцы, для яго неабходна стварыць камфортныя ўмовы для
пражывання. Таксама ўдзельнікі сустрэчы цікавіліся ў парламентарыя (былога
намесніка міністра сельскай гаспадаркі і харчавання Беларусі) вырашэннем
пытанняў далучэння слабых гаспадарак да больш моцных, вылучэннем крэдытаў
сельгаспрадпрыемствам, якой павінна быць працягласць працоўнага дня і работа ў
выхадныя дні, гаварылі пра баўленне вольнага часу і г.д.
— На маю думку, сустрэча вельмі
важная. Заўсёды цікава даведацца, як і чым жыве моладзь, асабліва маладыя
кіраўнікі, якія прадаўжаюць у раёне пачатыя традыцыі, — падзялілася Людміла
Ніжэвіч. — Як чалавек, які многа гадоў аддаў сельскай гаспадарцы, магу адзначыць,
што ўзнятыя пытанні правільныя, своечасовыя і да іх трэба прыслухоўвацца. Я
рада, што ў нас ёсць такая моладзь, і ёй трэба дапамагаць, падтрымліваць.
Сустрэча адбылася ў в. Вусава, ля
былых мясцін панскага маёнтка. Зараз сіламі педагогаў і навучэнцаў Капыльскага
дзяржаўнага каледжа тут ствараецца аграсядзіба пад назвай «Мядовая заімка». Як
расказаў дырэктар установы адукацыі Анатоль Пяткевіч, гэта праект, які бу-дзе
накіраваны ў першую чаргу на развіццё пчалярства і турызму. Адзін з эпізодаў
праекта — абустройства прыбярэжнай зоны вадаёма, прызначанай для турызму і
правядзення культурна-масавых мерапрыемстваў. Будуць зроблены альтанкі,
створаны малыя архітэктурныя формы, дзіцячая пляцоўка, для гульні ў пляжны
валейбол і г.д. А вось другая зона будзе прысвечана развіццю пчалярства і там
жа размесціцца міні-заапарк. Для адпачываючых будзе прапанавана паслуга сну на
вуллях. Для ажыццяўлення ўсіх задум і ідэй вядзецца штодзённая праца,
праходзяць суботнікі, вялікую падтрымку аказвае і мясцовае сельгаспрадпрыемства.
Сяргей
КОЗЕЛ