Лічаныя
дні засталіся да Дня горада, які традыцыйна адзначаецца ў Капылі ў апошнюю
суботу жніўня.
Гэта свята — не толькі магчымасць
для гараджан разам весела правесці свой вольны час, але і своеасаблівая
справаздача аб тым, што было зроблена за год, каб наш Капыль стаў яшчэ больш
прыгожым і ўтульным.
Уважлівыя гараджане не толькі
маглі назіраць за змяненнямі, якія адбываліся на працягу года, але і самі
прымалі ўдзел у добраўпарадкаванні раённага цэнтра: удзельнічалі ў суботніках,
наводзілі парадак на замацаваных тэрыторыях, на сваіх прысядзібных участках.
Не засталіся ўбаку і прадстаўнікі
малога бізнесу. Напрыклад, было заўважана, што ў гарадскім скверы, насупраць
так званага Капыльскага прадмесця, працаваў міні-экскаватар, які прапанаваў ІП
Вішнеўскі. Экскаватаршчык Генадзь Шатроўскі спорна здымаў верхні слой глебы на
невялікіх участках уздоўж дарожак. Як аказалася, пазней яны былі аформлены ў
выглядзе палавінак сэрцаў, якія цягнуцца адна да адной. І гэта сімвалічна,
паколькі дадзены сквер знаходзіцца насупраць ЗАГСа.
Ідуць работы і на іншых аб’ектах.
Завершаны капітальны рамонт дома № 8 па вуліцы Максіма Горкага, які
набыў непаўторны выгляд. Рамантуе Капыльская ЖКГ і суседні дом, знешні выгляд
якога, па ўсім відаць, таксама будзе радаваць вока прахожых.
Арганізавана пафарбоўка фасада
гасцініцы, завяршаюцца рамонт у будынку ЗАГСа і работы па добраўпарадкаванні
вакол яго. Засталося толькі заасфальтаваць прыдамавую тэрыторыю па
Партызанскай, 7, прыгожы выгляд набывае адрэзак вуліцы Партызанскай, размешчаны
за скрыжаваннем, і г.д.
Словам, горад рыхтуецца да свята і
ў суботні дзень 25 жніўня паўстане перад сваімі жыхарамі і гасцямі ва ўсёй
красе.
Маргарыта
САКОВІЧ
