У Кнігу працоўнай славы Капыльскага раёна занесены звесткі аб людзях, якія сваёй працай і актыўнай грамадскай дзейнасцю ўнеслі значны ўклад у вытворча-эканамічнае і сацыяльна-культурнае развіццё раёна.
Сёлета да імён 34 жыхароў раёна, ужо занесеных у Кнігу працоўнай славы, дабавіліся яшчэ дзевяць.
Разгледзеўшы матэрыялы, прадастаўленыя Капыльскім раённым выканаўчым камітэтам, Капыльскі раённы Савет дэпутатаў 17 жніўня 2018 г. прыняў рашэнне № 20 «Аб занясенні ў Кнігу працоўнай славы Капыльскага раёна».У Кнігу працоўнай славы Капыльскага раёна занесены звесткі аб наступных грамадзянах, якія ўнеслі значны ўклад у сацыяльна-эканамічнае развіццё раёна, сваёй працай праславілі Капыльшчыну.
КАСІНСКІ Уладзімір Антонавіч, ветэран працы.
50 гадоў адпрацаваў брыгадзірам, тэхнікам-асемянатарам у племзаводзе імя Дзяржынскага Капыльскага раёна. За вялікія поспехі, дасягнутыя ў галіне сельскай гаспадаркі, і актыўны ўдзел у грамадска-палітычным жыцці быў узнагароджаны медалём «За доблесную працу. У азнаменаванне 100-годдзя з дня нараджэння Уладзіміра Ільіча Леніна» (1970 г.), медалём «За працоўную доблесць» (1973 г.), ордэнам Працоўнага Чырвонага Сцяга (1976 г.), ордэнам Дружбы народаў (1986 г.).
ЧАРКАС Ідалія Канстанцінаўна, ветэран працы, былы дырэктар Капыльскай цэнтралізаванай бібліятэчнай сістэмы.
Унесла вялікі ўклад у развіццё бібліятэчнай справы, больш за 35 гадоў аддала служэнню людзям і прафесіі. Узнагароджана знакам «Пераможца сацыялістычнага спаборніцтва 1976 года», ордэнам «Знак Пашаны» (1981 г.), медалём «Ветэран працы» (1984 г.), значком Міністэрства культуры СССР «За выдатную працу» (1990 г.), шматлікімі граматамі і падзякамі.
ВОЙЦІК Любоў Васільеўна, дырэктар Дзяржаўнай установы адукацыі «Лясноўская сярэдняя школа».
Установа адукацыі пад кіраўніцтвам Л.В. Войцік займае лідзіруючыя пазіцыі па розных напрамках навучання і выхавання. За асабісты ўклад у развіццё сістэмы адукацыі раёна ўзнагароджвалася Ганаровымі граматамі і падзякамі міністэрстваў адукацыі, прыродных рэсурсаў і аховы навакольнага асяроддзя, сельскай гаспадаркі і харчавання, Мінскага абласнога выканаўчага камітэта. Мае нагрудны знак «Выдатнік адукацыі Рэспублікі Беларусь» (2006 г.).
ДАРАШЭВІЧ Віктар Міхайлавіч, трактарыст-машыніст сельскагаспадарчай вытворчасці адкрытага акцыянернага таварыства «Старыца-Агра».
Больш за 30 гадоў працуе ў сельскагаспадарчай галіне, мае высокія паказчыкі ў працы. Узнагароджаны медалём «За працоўныя заслугі» (2018 г.).
МЫСІНА Зінаіда Мікалаеўна, загадчык дзяржаўнай установы адукацыі «Дашкольны цэнтр развіцця дзіцяці «Сонейка» г. Капыля».
Сучасныя метады і падыходы ў кіраўніцтве Мысінай З.М. забяспечваюць выніковасць і паспяховасць у працы калектыву. За высокі прафесіяналізм, асабісты ўклад у развіццё сістэмы адукацыі раёна неаднаразова ўзнагароджвалася Ганаровымі граматамі Міністэрства адукацыі, Мінскага абласнога выканаўчага камітэта. Мае нагрудны знак «Выдатнік адукацыі Рэспублікі Беларусь» (2005 г.).
КАЛЯДА Іван Васільевіч, вадзіцель аўтамабіля філіяла «Аўтамабільны парк № 21» адкрытага акцыянернага таварыства «Мінаблаўтатранс».
За 42-гадовы стаж працы ў галіне не мае парушэнняў правіл дарожнага руху і правіл перавозкі пасажыраў, дасягнуў высокіх паказчыкаў у працы, паказвае прыклад высокай культуры абслугоўвання. Узнагароджаны нагрудным знакам з адзнакай Міністэрства транспарту і камунікацый Рэспублікі Беларусь «Ганаровы транспартнік» (2017 г.).
КУЛЬБІЦКІ Мікалай Мікалаевіч, загадчык вытворчасці камунальнага ўнітарнага прадпрыемства «Капыльскі РБУ».
Больш за 25 гадоў працуе ў будаўнічай галіне, мае высокія паказчыкі ў працы. Неаднаразова ўзнагароджваўся Ганаровымі граматамі і Падзячнымі лістамі Капыльскага раённага выканаўчага камітэта і Мінскага абласнога выканаўчага камітэта.
ГУЛЕВІЧ Ірына Уладзіміраўна, урач функцыянальнай дыягностыкі (загадчык) кабінета функцыянальнай дыягностыкі ўстановы аховы здароўя «Капыльская ЦРБ».
За час працы на пасадзе галоўнага ўрача ЦРБ (студзень 1997 — красавік 2012 года) сфера аховы здароўя раёна зведала шэраг пераўтварэнняў, паспяховых новаўвядзенняў, мадэрнізацый. За шматгадовую і добрасумленную працу ў сістэме аховы здароўя, вялікі асабісты ўклад у справу развіцця аховы здароўя насельніцтва раёна, актыўны ўдзел у дэпутацкай дзейнасці І.У. Гулевіч неаднаразова ўзнагароджвалася Ганаровымі граматамі Капыльскага райвыканкама, галоўнага ўпраўлення аховы здароўя Мінскага аблвыканкама.
ПАЗНЯК Анатоль Мікалаевіч, ветэран лесагаспадарчай галіны.
За шматгадовую добрасумленную працу, асабісты ўклад у развіццё лесапаляўнічай гаспадаркі Рэспублікі Беларусь неаднаразова ўзнагароджваўся Граматамі Міністэрства лясной гаспадаркі Рэспублікі Беларусь, Дзяржаўнай інспекцыі аховы жывёльнага і расліннага свету пры Прэзідэнце Рэспублікі Беларусь.
