Капыльскія хлапчукі — браты Аляксей і Раман Лосевы — сталі пераможцамі конкурсу «Адзін дзень у Мінску», які праводзіўся сярод чытачоў часопіса «Юны выратавальнік».
■ Аляксей і Раман Лосевы
Разам з бацькамі Вольгай і Віктарам яны былі запрошаны ў сталіцу нашай краіны, каб весела і незабывальна правесці адзін дзень з рэдакцыяй выдання.
Хлопчыкі і дзяўчынкі прынялі ўдзел у святкаванні 165-гадовага юбілею пажарнай службы. Выратавальнікі арганізавалі для гасцей цудоўнае шоу ў паветры, на вадзе і на зямлі. Парадам прайшлі 60 адзінак тэхнікі — ад конніцы ХІХ стагоддзя да сучаснага навейшага транспарту МНС.
А затым для юных удзельнікаў свята былі арганізаваны конкурсы і выпрабаванні, падчас якіх можна было зарабіць мясцовую валюту «бмопсікі», а пазней памяняць іх на ласункі і сувеніры. Напрыканцы мерапрыемства хлопчыкаў і дзяўчынак чакаў святочны абед, які суправаджаўся конкурсамі і гульнямі ад рэдакцыі часопіса. На памяць аб сустрэчы з любімым выданнем рабяты атрымалі памятныя падарункі. Дамоў яны вярталіся з гарачым  жаданнем прадоўжыць удзел у конкурсе, каб зноў атрымаць запрашэнне на такое цудоўнае свята.
Маргарыта САКОВІЧ