Дэлегацыя Капыльскага
раёна на чале са старшынёй раённага Савета дэпутатаў Ірынай Кісляк прыняла
ўдзел у святкаванні 80-годдзя Арэнбургскага раёна (Расія), з якім заключаны
дагавор аб супрацоўніцтве і пабрацімскіх сувязях.
■ Старшыня Савета дэпутатаў Арэнбургскага
раёна Уладзімір Калінін (злева) з дэлегацыяй Капыльскага раёна
У склад капыльскай дэлегацыі таксама
ўвайшлі начальнік аддзела ідэалагічнай работы, культуры і па справах моладзі
райвыканкама Ларыса Юха, старшыня Пацейкаўскага сельвыканкама Сяргей Цвірко і
галоўны бухгалтар Капыльскага вопытнага лясгаса Кацярына Тароцька. З нашага
боку гэта быў першы візіт у адказ. Арэнбуржцы наведвалі наш раён два гады запар
— падчас святкавання Дня горада.
Як расказала Ірына Кісляк, адбылося
знаёмства з адміністрацыйнай структурай дзялення раёна, у якім пражывае больш
за 100 тысяч чалавек. Колькасць насельніцтва павялічваецца штогод. У сувязі з
гэтым на 2019 год дадаткова запланавана будаўніцтва трох школ. Адбылося
знаёмства і з дзейнасцю фермерскіх гаспадарак, у прыватнасці тых, якія
займаюцца вырошчваннем агародніны і кветак у цяпліцах.
Пабывала дэлегацыя і ў адміністрацыі
муніцыпальнага фарміравання Чарнарэчанскага сельсавета, дзе іх вітаў казачы хор
«Казачэнька». Сустрэліся з мясцовымі школьнікамі.
Як адзначыла Ірына Кісляк, расійскія сябры
адкрыты для дыялогу. Пакуль што абмеркаваны планы па супрацоўніцтве ў сферы
адукацыі і культуры. У далейшым сувязі будуць прадаўжацца.
Сяргей КОЗЕЛ
