Прысвячаўся велапрабег
Году малой радзімы, 100-годдзю ВЛКСМ, 75-й гадавіне вызвалення Беларусі ад
нямецка-фашысцкіх захопнікаў і прайшоў у рамках міжнароднай акцыі «Дзень без
аўтамабіля».
Удзел у ім прынялі прадстаўнікі грамадскіх,
маладзёжных арганізацый, выхаванцы навучальных і спартыўных устаноў горада,
навучэнцы каледжа. Арганізатарамі мерапрыемства выступілі Капыльскі
райвыканкам, раённая арганізацыйная структура ДТСААФ, раённыя арганізацыі
грамадскіх аб’яднанняў «БРСМ» і «Белая Русь», раённая ветэранская арганізацыя і
раённае аб’яднанне прафсаюзаў.
Зыходным пунктам маршруту стаў помнік
воінам-вызваліцелям Капыля на скрыжаванні вуліц Партызанскай і Цімкавіцкай. Тут
да яго была ўскладзена гірлянда і адбылося адкрыццё мерапрыемства. Перад
удзельнікамі прабегу выступіў старшыня РАС ДТСААФ Аляксандр Касінскі, які
ўзгадаў пра баявыя падзеі мінулых гадоў. Хвілінай маўчання была ўшанавана
памяць загінулых у гады Вялікай Айчыннай вайны.
Наступны прыпынак — на вуліцы Заазёрнай.
Тут устаноўлены помнік у памяць аб апошнім баі 1-й батарэі 255-га
зенітна-артылерыйскага палка пад камандаваннем гвардыі капітана Іванова пры
вызваленні Капыля ад нямецка-фашысцкіх захопнікаў 1 ліпеня 1944 года.
Далей удзельнікі велапрабегу накіраваліся
ва ўрочышча Гнілуха, на месца, дзе адбыўся першы на тэрыторыі раёна бой з
удзелам партызанскіх атрадаў імя Чапаева, Катоўскага і Будзёнага. Таксама
ўскладзены кветкі і да помніка воінам-вызваліцелям у аграгарадку Мажа.
Было падчас велапрабегу месца і для
адпачынку — экааграсядзіба «Мядовая заімка» Капыльскага дзяржаўнага каледжа.
Тут можна было пазнаёміцца з абустройствам тэрыторыі, пачаставацца апетытнай
юшкай, так званай салдацкай кашай і мядовым напіткам.
Крыху стомленыя, але з цудоўным настроем,
усе ўдзельнікі вярталіся дамоў.
Сяргей КОЗЕЛ