Узорны
эстрадны аркестр Капыльскай дзіцячай школы мастацтваў пад кіраўніцтвам Льва
Канапляніка атрымаў Дыплом І ступені і каштоўны падарунак — камплект гукавога
абсталявання — па выніках юбілейнага, XV абласнога фестывалю народнай творчасці
«Напеў зямлі маёй». Конкурс сабраў у Мар’інай Горцы 23 творчыя калектывы з усіх
рэгіёнаў Мінскай вобласці.
Фестываль штогод праходзіць на
малой радзіме старшыні Беларускага саюза кампазітараў Ігара Лучанка. Мэта
мерапрыемства — павышэнне майстэрства аматарскіх калектываў рэгіёну, падтрымка
і стымуляванне таленавітых удзельнікаў, узбагачэнне рэпертуару аматарскіх
калектываў лепшымі творамі народнага мастацтва, захаванне асаблівасцей народнай
творчасці, паляпшэнне матэрыяльнай базы аматарскіх калектываў.
«Напеў зямлі маёй» праводзіцца ў
кастрычніку невыпадкова: менавіта гэтымі восеньскімі днямі ўся краіна
віншуе работнікаў культуры. Сёлета агульная колькасць удзельнікаў — каля
700 чалавек. Капыльскiя музыканты падрыхтавалі інструментальную кампазіцыю
паводле твора амерыканскага яўрэйскага кампазітара акадэмічнай, эстраднай,
тэатральнай і літургічнай музыкі Шалома Секунды «У маіх вачах ты прыгажуня».
Апрацоўку твора зрабіў вядомы беларускі гітарыст Аляксандр Вініцкi, а
перакладанне для аркестра — Леў Канаплянiк.
Па словах дырэктара Капыльскай
дзіцячай школы мастацтваў Уладзіміра Чаркаса, навінкай конкурснай праграмы ў
гэтым годзе стала падрыхтоўка відэаанонса, які ўключаў у сябе працэс
абмеркавання ідэі, рэпетыцыйныя моманты нумара, інтэрв’ю з кіраўніком і
ўдзельнікамі і інш. Таксама неабходна было зрабіць слайд-шоу або відэакантэнт
непасрэдна канцэртнага твора. І, як адзначылі члены журы, з рэжысёрскай
канцэпцыяй капыляне справіліся на выдатна.
— У фестывалi прымаем удзел
трэці раз, — дзеліцца ўражаннямі кіраўнік узорнага эстраднага аркестра Леў
Мiхайлавiч. — Для нас гэта выдатны вопыт і ўнікальная магчымасць прадэманстраваць
свой талент і прафесіяналізм, атрымаць высокую адзнаку журы. I гэтая ўзнагарода
не першая, але ў ліку самых важных. У 2010 годзе Гран-пры імпрэзы ў
Мар’інай Горцы — аўтобус — дастаўся менавiта нашаму аркестру, а ў 2016 годзе
атрымалі Дыплом Лаўрэата ІІІ ступені. Гэта высокая адзнака не толькі маёй
працы, але і маіх выхаванцаў, канцэртмейстараў Дзмітрыя Масілевіча, Багдана
Шыпая, Марыны Сельвановіч, Алены Валчкевіч i ўвогуле ўсяго калектыву школы
мастацтваў.
Таццяна
БОХАН
