Больш за
420 жыхароў Капыльшчыны далучыліся да рэспубліканскай акцыі «Чысты лес», якая
прайшла ў Беларусі 20 кастрычніка.
Самымі актыўнымі былі навучэнцы і
педагогі ўстаноў адукацыі раёна. Як расказала намеснік дырэктара Капыльскага
вопытнага лясгаса Таццяна Канаплянік, хлопчыкі і дзяўчынкі з СШ № 3 г. Капыля,
Слабадакучынскай школы прыбіралі смецце ў лясных масівах і ўздоўж аўтамабільных
дарог, наводзілі парадак у зонах адпачынку Капыля, ля возера Астравок,
«Крынічка» непадалёку вёскі Свідзічы. Адначасова супрацоўнікамі лясгаса
вывучаліся новыя аб’екты для ўстаноўкі фотапастак, якія дапамогуць выявіць
парушальнікаў прыродаахоўнага заканадаўства.
Займаліся ў гэты дзень і пасадкай
лясных культур. Паводле слоў Таццяны Георгіеўны, на працягу двух дзён (19 і 20
кастрычніка) было пасаджана 120 тысяч сеянцаў сасны і каля 6 тысяч сеянцаў
вольхі чорнай на плошчы 29,1 га. Работы разгарнуліся ва ўсіх лясніцтвах, дзе
працавалі прадстаўнікі працоўных калектываў СШ № 3 г. Капыля, Капыльскага
дзяржаўнага каледжа, Смаліцкой, Семежаўскай, Бучацінскай, Камсамольскай,
Старыцкай, Слабадакучынскай школ, ААТ «Ціміразеўскі» і, вядома ж, работнікі лясной
гаспадаркі.
Для школьнікаў — удзельнікаў акцыі
— адміністрацыя Капыльскага вопытнага лясгаса падрыхтавала невялікія памятныя
падарункі: блакноцікі, магніты, буклеты на прыродаахоўную тэматыку, вырабленыя
ў рэдакцыі «Слава працы».
Маргарыта
САКОВІЧ