Слупок
тэрмометра ў начны час у мінулыя дні апускаўся за адзнаку ў дзесяць градусаў
марозу, што і паспрыяла перыяду ледаставу. Прыхільнікі падлёднай рыбалкі хочуць
як мага хутчэй ступіць на тонкі лёд. Дзеці і дарослыя — аматары зімовага спорту
— таксама не супраць выпрабаваць замёрзлую водную гладзь.
Самыя нецярплівыя з іх выбіраюцца
на нямоцны лёд, падвяргаючы сваё жыццё і здароўе сур’ёзнай небяспецы. На жаль,
сумная статыстыка гібелі на вадаёмах у нашай краіне з надыходам першых маразоў
стартавала. Гінуць як дарослыя, так і дзеці.
Як вядома, для прадухілення
няшчасных выпадкаў з пачатку снежня ў раёне дзейнічае забарона выхаду на лёд да
асобага распараджэння. Падчас ледаставу, пакуль таўшчыня лёду не дасягае 10
сантыметраў, а таксама ў перыяд інтэнсіўнага раставання і разбурэння лёду
грамадзянам забараняецца выхад на лёд на вадаёмах, размешчаных на тэрыторыі
Капыльскага раёна. Таксама забараняецца рух па лёдзе транспартных сродкаў, якія
маюць адмоўную плывучасць. Ва ўстановах і арганізацыях раёна праводзіцца
прафілактычная работа, рэйды з мэтай прадухілення няшчасных выпадкаў з людзьмі
на лёдзе. Напрыклад, днямі супрацоўнікі ПАВЧ № 1 г. Капыля пабывалі на вадаёме
каля гарадскога пляжа, дзе пагутарылі з аматарамі зімовай рыбнай лоўлі, раздалі
ім наглядную агітацыю, праверылі таўшчыню лёду, узгадалі некаторыя навыкі
выратавання.
— Што ж рабіць, калі ўжо так
здарылася, што чалавек апынуўся ў экстрэмальнай сітуацыі, праваліўшыся пад лёд,
— спыталі мы ў начальніка Капыльскага РАНС Віталя Ільючыка.
— У першую чаргу неабходна не
панікаваць, не рабіць рэзкіх рухаў, напаўзці на лёд з шырока расстаўленымі
рукамі, — адказаў Віталь Валянцінавіч. — Ні ў якім разе нельга ўставаць на
ногі, бо застаецца небяспека зноў праваліцца пад лёд, лежачы на спіне ці
жываце, трэба прасоўвацца ў бок берага, адначасова заклікаючы на дапамогу. А
калі вы апынуліся відавочнікам здарэння, то перш за ўсё рэальна ацаніце
абстаноўку: ці зможаце аказаць дапамогу самастойна. Калі так, то падпаўзіце да
месца пралому лёду на 3-4 метры, падайце пацярпеламу падручныя прадметы: палку,
дошку, вяроўку, лесвіцу. Калі ратавальнікаў двое або некалькі, утварыце
ланцужок, утрымліваючы адзін аднаго за ногі. Дзейнічайце рашуча, але асцярожна.
Пасля ратавання развядзіце вогнішча і абагрэйце пацярпелага. У выпадку
неабходнасці неадкладна тэлефануйце па нумарах тэлефонаў 101 і 112. І самае
важнае: не дапускайце выхаду на лёд дзяцей!
Сяргей
КОЗЕЛ
