Акцыяй пад
такой назвай члены пярвічнай арганізацыі ГА «Беларускі саюз жанчын» санаторнага
ясляў-сада г. Капыля распачалі сезон дабрачыннасці-2019.
Ініцыятарам мерапрыемства
выступіла старшыня пярвічкі Любоў Кот. Яна прапанавала сабраць рэчы ў добрым
стане, якія самім ужо не патрэбны, і перадаць тым, хто мае ў гэтым
неабходнасць, — малазабяспечаным і мнагадзетным сем’ям, выхаванцам інтэрната.
Актыўнага лідара пярвічкі падтрымала і аказала ёй усебаковую дапамогу старшыня
раённай арганізацыі ГА «БСЖ» Святлана Маліноўская.
Удзельніцы
акцыі «Імпульс дабрыні»
Да справы падышлі грунтоўна: не
толькі пастараліся прыцягнуць да ўдзелу як мага больш членаў калектыву, але
далі акцыі назву і нават распрацавалі ўласную эмблему, якую ў выглядзе наклеек
уручылі супрацоўніцам падчас мерапрыемства, прысвечанага падвядзенню вынікаў.
На міні-свяце ўсё, што атрымалася сабраць з дапамогай неабыякавых жанчын (а іх,
трэба адзначыць, знайшлося нямала), пасля папярэдняга вопісу перадалі сакратару
РА ГА «БСЖ» Ганне Дзіткоўскай. Яна выступіла звяном, што злучыла пярвічку
ясляў-сада з Капыльскім ТЦСАН — менавіта там рэчы атрымаюць сваё другое жыццё і
знойдуць новых гаспадароў.
Як патлумачыла Любоў Кот, многія
педагогі іх установы ўжо не раз аказвалі такога плана дапамогу разнастайным
грамадскім аб’яднанням. Таму ў спагадлівасці і чуласці членаў калектыву не
прыходзіцца сумнявацца — пры арганізацыі дабрачынных акцый водгук заўсёды
знаходзіцца.
— Як паказвае практыка, дабро
рабіць няцяжка. І не патрэбна шукаць нагоду для таго, каб выказаць свае цяпло і
чалавечнасць, — удакладніла Любоў Аляксандраўна. — Хочацца спадзявацца, што наш
вопыт стане стымулам для правядзення акцыі «Імпульс дабрыні» і ў іншых
арганізацыях Капыльшчыны. Мы ж, у сваю чаргу, плануем праводзіць яе на
пастаяннай аснове — падмурак ужо закладзены і прынёс свой плён.
Аксана
МІХАЙЛОЎСКАЯ
