Жыццё
даецца, каб жыццё тварыць. З гэтым дэвізам і крочыць па жыцці народны майстар
Беларусі, майстар-метадыст раённага Цэнтра ткацтва Вера Васільеўна Нікалаевіч,
якая сёлета адзначыла 70-гадовы
юбілей.
■В.М. КіеняіВ.В. Нікалаевіч — народныямайстрыБеларусі
Сонечным сакавіцкім днём у РЦТ
сабраліся родныя і блізкія, сябры і калегі Веры Васільеўны, каб павіншаваць яе
са святам. Шчырыя пажаданні моцнага здароўя, даўгалецця, аптымізму, веры,
надзеі і любові гучалі ў адрас юбіляркі ад галоўнага спецыяліста аддзела
ідэалагічнай работы, культуры і па справах моладзі райвыканкама Таццяны
Віяленцій, дырэктара Цэнтра традыцыйнай культуры Галіны Гурло, дырэктара
раённага цэнтра культуры Наталлі Рыбак і супрацоўнікаў ЦТ.
Зацікавіла прысутных персанальная
выстава работ майстра, на якой былі прадстаўлены не толькі вытканыя за час яе
працы майстрам-метадыстам РЦТ вырабы, але і больш ранняга часу.
Пройдзены 70-гадовы шлях… За
плячыма назапашаны жыццёвы вопыт, вопыт сталасці і мужнасці. Вера Васільеўна —
клапатлівая маці і бабуля, надзейная сяброўка, энергічная і вельмі працавітая
жанчына, чулы і добры чалавек, высакакласны спецыяліст ткацкай справы. Сваё
захапленне ткацтвам, любоў да народнага мастацтва пранесла праз усё жыццё.
Вырабы, створаныя яе рукамі, — гэта кавалачак яе душы, яе радасці, свет яе
захаплення. Яна пастаянная ўдзельніца мясцовых, раённых, рэгіянальных свят і
конкурсаў народнай творчасці. У 2017 годзе была ўзнагароджана дыпломам III
ступені «За аднаўленне мясцовых традыцый ткацтва на кроснах» на VII абласным
свяце-конкурсе па ткацтве «Матчыны кросны», узнагароджана дыпломамі за ўдзел у
IX і X Рэспубліканскіх фестывалях-кірмашах народных мастацкіх рамёстваў
«Вясновы букет» за 2017 і 2018 гады.
Прыгажосць, якая ствараецца
ткачом, — гэта вынік доўгіх і карпатлівых пошукаў. Працуючы на пасадзе
майстра-метадыста, з новым размахам занялася майстрыха матулінай навукай —
ткацтвам. У кожнага майстра свой узор, сваё майстэрства. Але вынік адзін:
прыгажосць, якую ствараюць іх рукі і сэрцы. І яшчэ вельмі важна, каб тое майстэрства
засталося нашчадкам і паслядоўнікам. Таму сваю справу, свой вопыт і ўменне,
непаўторны ўласны стыль, душу Вера Васільеўна перадае маладому пакаленню, для
шматлікіх наведвальнікаў Цэнтра ткацтва праводзіць майстар-класы па ткацтве на
кроснах.
цёплыя і шчырыя словы падзякі за
талент, захаванне народнага рамяства, жаданне дзяліцца сваім вопытам з
маладым пакаленнем гучалі і ў адрас народнага майстра Беларусі Валянціны
Міхайлаўны Кіені, якая таксама ў сакавіку адзначыла свой чарговы дзень
нараджэння. Гэтыя жанчыны па-сапраўднаму ўлюбёныя ў сваю справу. Можна
толькі па-добраму пазайздросціць маладосці іх душы. Гэтая дата, дзень
нараджэння, — добрая магчымасць сказаць словы падзякі за іх залатыя рукі і
нястомнае сэрца, за тую жывую спадчыну, якую яны захоўваюць і перадаюць
падрастаючаму пакаленню. Жадаем вам моцнага здароўя, творчага натхнення,
поспехаў у рабоце і чым паболей высакакласных мастацкіх вырабаў, зробленых
вашымі рукамі, якія будуць радаваць нашы вочы.
Таццяна
ВОЛКАВА,
дырэктар раённага Цэнтра
ткацтва
