Новыя насаджэнні ўпрыгожваюць розныя куткі
аграгарадка. Так, на месцы былога сметніка высаджана каля сотні елачак. Сем
елак, як сімвал Семежава, пасаджаны на ўездзе ў населены пункт.
Абнаўляецца і цэнтральны сквер у
аграгарадку, каля 280 саджанцаў з’явілася на тэрыторыі жывёлагадоўчых і іншых
вытворчых аб’ектаў. Пасадачны матэрыял у асноўным закупляецца ў Капыльскім
вопытным лясгасе і ў іншых гадавальніках.
З 13 па 20 красавіка па
ініцыятыве Міністэрства лясной гаспадаркі адбудзецца рэспубліканская акцыя «Тыдзень
лесу», прысвечаная Году малой радзімы і 75-годдзю вызвалення Беларусі ад
нямецка-фашысцкіх захопнікаў.
Усяго ж у раёне ў рамках акцыі запланавана
пасадзіць звыш 6 тысяч дрэўцаў і каля 1200 кустарнікаў. Самыя вялікія аб’ёмы
неабходна выканаць на тэрыторыі Цімкавіцкага сельсавета, дзе будзе прадоўжана
пасадка вольхі, дубоў, сосен і іншых дрэў.
Падчас суботніка ў мінулыя выхадныя многія
арганізацыі і прадпрыемствы ўключыліся ў пасадку. Так, у аграгарадку Лясное
каля сталовай высаджаны бярозкі і клёны, каля лазні — чырвоны дуб, у в. Бабоўня
парк каля канторы папоўніўся 30 маладымі дрэўцамі. Жыхары аграгарадка Пацейкі і
мясцовы сельвыканкам добраўпарадкоўвалі сажалку і высадзілі ліпавую і
каштанавую алеі. Калектыў Капыльскага раёна электрычных сетак высадзіў звыш 50
сосен вакол агароджы ПС-110 «Капыль».
Сяргей КОЗЕЛ
