У фінале
абласнога этапа рэспубліканскага творчага конкурсу «Жывая класіка» навучэнка
Дзяржаўнай установы
адукацыі «Грозаўскі вучэбна-педагагічныкомплекс дзіцячы сад — сярэдняя школа»
Юлія Дарашэвіч стала прызёрам.
Конкурс юных чытальнікаў «Жывая
класіка: прысвячэнне маёй Радзіме» адбыўся на базе ДУА «Мінскі абласны інстытут
развіцця адукацыі». Да ўдзелу ў ім былі запрошаны вучні з усіх раёнаў Мінскай
вобласці, якія сталі пераможцамі раённага этапа. Наша зямлячка на суд журы
вынесла ўрывак з паэмы Анатоля Вярцінскага «Песня пра хлеб». Падрыхтавала
шасцікласніцу да ўдзелу ў конкурсе настаўнік беларускай мовы і літаратуры
вышэйшай кваліфікацыйнай катэгорыі Алена Дубіна.
— Юля — усебакова развітая
дзяўчынка, — дзеліцца педагог Алена Хакімаўна. — Сёлета яна стала выдатніцай у
раённай алімпіядзе па матэматыцы, а ў раённым этапе конкурсу «Жывая класіка»
атрымала Дыплом І ступені. А яшчэ Юля выдатна малюе і цудоўна піша сачыненні.
Складана было ўдзельнічаць у абласным этапе, дзе было заяўлена 23 дзіцяці ў
групе, палова з якіх займаецца ў тэатральных студыях. Вучняў ацэньвала
кампетэнтнае журы, якое складалася з таленавітых пісьменнікаў і паэтаў. Але
наша Юля справілася на выдатна: настолькі артыстычна прачытала яна ўрывак,
пранікнёна перадала вобразы, прадэманстравала прыгажосць мастацкага
слова, чым данесла глыбокі сэнс твораў. І як вынік — Дыплом III ступені
ва ўзроставай катэгорыі 5–6 класы.
Шчыра віншуем нашу пераможцу і яе
настаўнiцу! Жадаем ім новых поспехаў і дасягненняў!
Таццяна
БОХАН