Прыемная навіна прыйшла
на Капыльшчыну. На ХІ рэспубліканскім фестывалі-кірмашы «Вясновы букет»
раённы цэнтр ткацтва ўзнагароджаны дыпломам за першае месца.
З кожным годам цікавасць да свята,
арганізаванага Міністэрствам культуры Беларусі, Мінгарвыканкамам, ГА «Беларускі
саюз майстроў народнай творчасці», расце. Сёлета на мерапрыемства з’ехаліся
каля 300 майстроў дэкаратыўна-прыкладной творчасці з усёй Беларусі, якія
адкрылі сезон правядзення свят нацыянальных культур. У ім бяруць удзел майстры,
якія адра-джаюць рэдкія і забытыя віды беларускай творчасці, а гараджане
захоплена з імі знаёмяцца.
Сваё майстэрства на фестывалі 25 мая ў
Верхнім горадзе г. Мінска дэманстравалі супрацоўнікі раённага цэнтра
ткацтва на чале з народнымі майстрамі Таццянай Волкавай і Верай Васільеўнай
Нікалаевіч, а таксама майстрам-метадыстам цэнтра ткацтва Наталляй
Сафронавай (на здымку злева направа). Майстры Капыльшчыны
прадставілі традыцыйнае закладное ткацтва чырвона-белых ручнікоў, а таксама
ткацтва пояса «на ніту» і «на бердзечку», якія па-сапраўднаму захапілі гараджан
і гасцей сталіцы. Сведчанне гэтаму — атрыманая высокая ўзнагарода.
Таццяна БОХАН
