Капыль у
рамках прэс-тура #Спадчынаўдзеянні наведалі журналісты і
блогеры, якія цікавяцца гісторыяй Беларусі.
Наш горад з яго багатай спадчынай
стаў месцам прыпынку журналісцкага дэсанту, паколькі Капыльскі раённы
краязнаўчы музей удала выступіў у конкурсе «Спадчына ў дзеянні», арганізаваным
Беларускім бюро ICOMOS. Усяго было пададзена 98 заявак з 30 гарадоў Беларусі. А
адной з узнагарод конкурсу з’яўляецца адмысловая прэзентацыя
праектаў-пераможцаў для журналістаў і прадстаўнікоў СМІ ў межах прэс-тура па
мясцінах з лепшымі прыкладамі рэстаўрацыі.
Падчас конкурсу нашы землякі
прадставілі ў намінацыі «Лепшая «папяровая» канцэпцыя рэстаўрацыі /
рэвіталізацыі / кансервацыі / рэадаптацыі архітэктурнай спадчыны» праект
экспазіцыйна-асяроддзевага комплексу гістарычнага цэнтра Капыля, распрацаваны
раённым краязнаўчым музеем сумесна з Беларускім камітэтам ICOMOS. Ён прадугледжвае
аб’яднанне жывой культуры і рэальнасці з культурнай спадчынай, якая існуе ў
Капылі. Сярод прапаноў, якія ўвайшлі ў праект, — стварэнне на Замкавай гары
рэкрэацыйна-забаўляльнага комплексу, які складаецца з «будынкаў-сімвалаў»,
«горада майстроў», крынічкі, фартыфікацыйных пабудоў ХІІ ст., «этнаграфічнага
тэатра» і іншых аб’ектаў. Рэалізацыя гэтага праекта, як мяркуюць яго
стваральнікі, дапаможа павышэнню цікавасці да горада і прыцягненню турыстаў.
Трэба адзначыць, што ў аснову
мастацкай канцэпцыі праекта ляглі вобразы твораў Казіміра Малевіча і Алены Кіш.
Раённы краязнаўчы музей быў узнагароджаны дыпломам.
Удзельнікі прэс-тура ў гэты
суботні дзень пазнаёміліся з музейнай экспазіцыяй падчас экскурсіі, якую
правяла старшы навуковы супрацоўнік музея Таццяна Варанцова, зрабілі экскурсію
па вуліцах Капыля ў суправаджэнні дырэктара музея Валянціны Шураковай (на здымку). Валянціна
Леанідаўна як заўсёды натхнёна і вельмі цікава расказала пра мінулае нашага
горада, яго славутых жыхароў, пазнаёміла з асноўнымі задумкамі конкурснага
праекта, адказала на шматлікія пытанні.
Маргарыта
САКОВІЧ
