100-гадовы юбілей — дата значная не толькі для самога чалавека і
яго сваякоў, але і для тых, хто па родзе сваіх заняткаў знаходзіцца побач. Таму
прадстаўнікі зацікаўленых службаў — а гэтым разам у іх ліку былі начальнік
упраўлення па працы, занятасцi i сацыяльнай абароне райвыканкама Іван Бабко,
дырэктар Капыльскага ТЦСАН, старшыня РА ГА «Беларускі саюз жанчын» Святлана
Маліноўская і старшыня Цімкавіцкага сельвыканкама Алена Острыкава — павіншавалі
жанчын, чый узрост стаў роўны цэламу стагоддзю.
■ Святлана Маліноўская, Алена Острыкава і Іван Бабко віншуюць
Ванду Міхайлаўну Гінц і яе дачку Галіну Мікалаеўну
Аграгарадок Браткава. Менавіта тут ва ўтульнай хаце
сустракала гасцей Ванда Міхайлаўна Гінц. З цеплынёй у вачах і ўсмешкай на
вуснах жанчына прымала кветкі і падарунак ад РА ГА «Беларускі саюз жанчын».
Жыве бабуля разам з дачкой Галінай Мікалаеўнай, да якой і пераехала 28 гадоў
таму з роднай вёскі Шчорсы Навагрудскага раёна, што на Гродзеншчыне. Усё жыццё
Ванда Міхайлаўна адпрацавала ў сельскай гаспадарцы. Разам з мужам выгадавала
траіх дзяцей, зараз радуюць пяцёра ўнукаў і столькі ж праўнукаў.
— Я вельмі вам удзячна за віншаванні і
падарункі! — шчыра і пранікнёна гаворыць юбілярка. — Ніколі б нават і не
падумала, што камусьці яшчэ патрэбна, што нехта памятае пра дзень майго
нараджэння.
— Памятаем, паважаная Ванда
Міхайлаўна, канешне, памятаем, — звярнулася да бабулі Святлана Станіславаўна. —
Таму будзьце здоровымі і чакайце нас на наступны юбілей.
Другая
юбілярка Марыя Кандратаўна Табальчук пражывае ў вёсцы Навасёлкі Цімкавіцкага
сельсавета. На жаль, сустрэць сама гасцей па стане здароўя бабуля не змагла.
Віншаванні прымала яе дачка Зінаіда Іванаўна Уласавец. Жанчына з ахвотай
расказала, што працоўны шлях яе матулі не быў простым, бо шчыраваць прыйшлося
на палявых работах у калгасе. Галоўным багаццем Марыі Кандратаўны і яе мужа
Івана Аляксандравіча, якому ў гады Вялікай Айчыннай давялося партызаніць,
сталі, канешне ж, чацвёра дзяцей. Зараз дапамагаюць даглядаць старую жанчыну
дзявяцера ўнукаў і шасцёра праўнукаў.
Дзіяна ТКАЧЭНКА
